கம்பம்: தேனி மாவட்டத்தில் பிரசித்தி பெற்ற சுருளி அருவி நீர் இன்றி வறண்டு காணப்படுகிறது. இதனால் சுற்றுலாப் பயணிகளும் பொதுமக்களும் ஏமாற்றத்துடன் திரும்பி செல்கின்றனர். தமிழ்நாட்டின் புண்ணிய ஸ்தலங்களில் ஒன்றாகவும் சுற்றுலா தலமாகவும் விளங்கி வருகிறது தேனி மாவட்டத்திலுள்ள சுருளி அருவி. இதற்கு ஈத்தாக்காடு, அரிசிப்பாறை மற்றும் மேகமலை, தூவானம் அணையில் இருந்து நீர்வரத்து உள்ளது. கடந்த வருடம் செப்டம்பர் மாதம் முதல் நீர்வரத்து அதிகரித்து காணப்பட்டது.

அதனை தொடர்ந்து வடகிழக்கு பருவமழை தொடங்கியது. அதனால் நீர்வரத்து அதிகமாக காணப்பட்டது. தற்சமயம் கடந்த மூன்று மாதமாக மழை எதுவும் இல்லாததால் சுருளி அருவி நீர்பிடிப்பு பகுதிகளான ஈத்தாக்காடு, அரிச்சிப்பாறை பகுதிகள் வறண்டு காணப்படுகிறது. இதனால் நீரின்றி சுருளி அருவி வறண்டு காணப்படுகிறது.

இதற்கிடையில் அடுத்த மாதம் 14ம் தேதி தமிழ் புத்தாண்டு அன்று ஆயிரக்கணக்கான சுற்றுலா பயணிகள் மற்றும் பொதுமக்கள் குளித்து மகிழ மேகமலை அருகில் உள்ள தூவானம் அணை பகுதியில் இருந்து சுருளி அருவிக்கு தண்ணீர் திறக்கப்படும் என எதிர்பார்க்கப்படுகிறது. தற்சமயம் சுருளி அருவியில் நீர்வரத்து இல்லாமல் வறண்டு உள்ளதால் சுற்றுலாப் பயணிகளும் பொதுமக்களும் ஏமாற்றத்துடன் திரும்பி செல்கின்றனர்.

The post கம்பம் அருகே நீரின்றி வறண்டது சுருளி அருவி: ஏமாற்றத்துடன் திரும்பிச் செல்லும் சுற்றுலா பயணிகள் appeared first on Dinakaran.