காஞ்சிபுரம்,டிச.9: காஞ்சிபுரத்தில் முன்னாள் படை வீரர் கொடிநாள் நிகழ்ச்சி நடந்தது. முன்னாள் படைவீரர் கொடிநாள் நிகழ்ச்சி கலெக்டர் அலுவலக வளாகத்தில் உள்ள மாவட்ட ஊரக வளர்ச்சி முகமை கூட்ட அரங்கில் கலெக்டர் கலைச்செல்வி மோகன் தலைமையில் நடைபெற்றது. கொடிநாள் நிதி வழங்கி கலெக்டர் நிகழ்ச்சியை தொடக்கி வைத்தார். இதனைத்தொடர்ந்து, கடந்த 2020 மற்றும் 2021ம் ஆண்டுகளில் ரூ.5 லட்சத்துக்கு மேல் நிதி வசூல் செய்த அலுவலர்களுக்கு ஆளுநர் அனுப்பியிருந்த பாராட்டுச் சான்றிதழ்களை வழங்கினார். போர் மற்றும் போர் நடவடிக்கைகளில் உயிரிழந்தவர்களின் வாரிசுதாரர்கள் மற்றும் ஊனமுற்ற படை வீரர்களுக்கு கலெக்டர் சால்வை அணிவித்து பரிசு வழங்கி கௌரவித்தார்.

பின்னர், கொடிநாள் கையேட்டையும் கலெக்டர் வெளியிட்டார். இந்நிகழ்வுக்கு, மாவட்ட வருவாய் அலுவலர் வெங்கடேஷ், சார் கலெக்டர் ஆஷிக்அலி, கலெக்டரின் நேர்முக உதவியாளர் (பொது)சத்யா, ஓய்வு பெற்ற லெப்டினன்ட் கர்னல் முஷீர் அகமது ஹிடேரி ஆகியோர் முன்னிலை வகித்தனர். முன்னாள் படை வீரர் நல உதவி இயக்குநர் சீனிவாசன் வரவேற்று பேசினார். நிறைவாக முன்னாள் படை வீரர்களுக்கு நலத்திட்ட உதவிகளாக கண்கண்ணாடிகளும், கல்வி உதவித் தொகையையும் கலெக்டர் வழங்கினார். இந்நிகழ்வில், முன்னாள் படை வீரர்கள் மற்றும் அரசு அலுவலர்கள் பலரும் கலந்து கொண்டனர்.

The post காஞ்சிபுரத்தில் முன்னாள் படை வீரர் கொடிநாள் நிகழ்ச்சி appeared first on Dinakaran.