நெல்லை: வடகிழக்கு பருவமழை காலமான அக்டோபர், நவம்பர், டிசம்பர் காலங்களில் ெநல்லை, தென்காசி, தூத்துக்குடி மாவட்டங்கள் எப்போதுமே நல்ல மழையை பெறுவது வழக்கம். கடந்தாண்டு முதல் 2 மாதங்கள் கைவிட்டாலும், டிசம்பர் மாதத்தில் நெல்லை, தூத்துக்குடி மாவட்டங்கள் வரலாறு காணாத மழையை சந்தித்தன. இந்தாண்டும் 3 மாவட்டங்களிலும் நல்ல மழையை எதிர்பார்த்து விவசாயிகள் காத்திருக்கின்றனர். நெல்லை, தூத்துக்குடி மாவட்டங்களில் கடந்த சில தினங்களாக பரவலாக மழை பெய்தது. குறிப்பாக மேற்குத் தொடர்ச்சி மலைப் பகுதிகளில் நல்ல மழை காணப்பட்டது. இதனால் பாபநாசம், மணிமுத்தாறு உள்ளிட்ட முக்கிய அணைகளுக்கு நீர்வரத்து அதிகரித்தது. நேற்று காலை நிலவரப்படி 143 அடி கொள்ளளவு கொண்ட பாபநாசம் அணை நீர்மட்டம் 89.20 அடியாக உள்ளது. அணைக்கு விநாடிக்கு நீர்வரத்து 980.83 கன அடியாகவும், நீர் வெளியேற்றம் 504.75 கனஅடியாகவும் உள்ளது.

156 அடி கொள்ளளவு கொண்ட சேர்வலாறு அணை நீர்மட்டம் 99.30 அடியாக உள்ளது. 118 அடி கொள்ளளவு கொண்ட மணிமுத்தாறு அணையில் நீரிருப்பு 78.16 அடியாக உள்ளது. அணைக்கு நீர்வரத்து 513.46 கனஅடியாகவும், வெளியேற்றம் 35 கனஅடியாகவும் உள்ளது. நெல்லை, தூத்துக்குடி மாவட்டங்களில் பருவமழையின் தீவிரத்தையடுத்து பிசான சாகுபடி பணிகளில் விவசாயிகள் மும்முரமாக ஈடுபட்டு வருகின்றனர். பல்வேறு இடங்களில் இயந்திரங்கள் மூலம் வயல்களை உழுது, தொழி அடிக்கும் பணிகள் நடந்து வருகின்றன. அருகன்குளம், பாலாமடை, கட்டளை, ராஜவல்லிபுரம் பகுதிகளில் விவசாயிகள் நடுவை பணிகளையும் தொடங்கி இருக்கின்றனர். விவசாய தொழிலாளர்கள் ஒரு வயலை நட்டு முடித்தவுடன், சிறிது நேர ஓய்வுக்கு பின்னர், பக்கத்து ஊருக்கு சென்று நடுவை பணிகளை தொடர்ந்து வருகின்றனர். குளங்களுக்கு தண்ணீர் வரத்தை பொறுத்து, சில கிராமங்களில் நடுவை பணிகளை தொடங்கும் எண்ணத்தில் உள்ளனர்.

 

The post நெல்லை, தூத்துக்குடி மாவட்டங்களில் பிசான சாகுபடி பணிகள் மும்முரம் appeared first on Dinakaran.