சென்னை: முதல்வர் மு.க.ஸ்டாலின் தலைமையில் வருகிற 13ம் தேதி தமிழக அமைச்சரவை கூட்டம் நடைபெறுகிறது. முதல்வர் மு.க.ஸ்டாலின் தொழில் முதலீடுகளை ஈர்க்க வருகிற 27ம் தேதி அமெரிக்க செல்ல திட்டமிட்டுள்ளார். சுமார் 10 நாட்கள் அமெரிக்காவில் தங்கி இருக்கும் முதல்வர், பல்வேறு தொழிலதிபர்களை சந்தித்து தமிழகத்தில் ெதாழில் தொடங்க வருமாறு அழைப்பு விடுக்கிறார். அமெரிக்காவில் முதல்வர் மு.க.ஸ்டாலின் கூகுள் நிறுவன செயல் அதிகாரி உட்பட பல்வேறு தொழில் அதிபர்களை சந்திப்பதோடு அமெரிக்கா வாழ் தமிழர்களையும் சந்திக்க திட்டமிட்டுள்ளார். இந்த நிலையில் வருகிற 13ம் தேதி காலை 11 மணிக்கு சென்னை, தலைமை செயலகத்தில் முதல்வர் மு.க.ஸ்டாலின் தலைமையில் தமிழக அமைச்சரவை கூட்டம் நடைபெறுகிறது.

இந்த கூட்டத்தில் பங்கேற்க அனைத்து அமைச்சர்களுக்கும் கடிதம் அனுப்பப்பட்டுள்ளது. முதல்வர் மு.க.ஸ்டாலின் அமெரிக்கா செல்ல உள்ள நிலையில் 13ம் தேதி நடைபெறும் அமைச்சரவை கூட்டம் முக்கியத்துவம் வாய்ந்ததாக கருதப்படுகிறது. இந்த கூட்டத்தில், தமிழகத்தில் புதிதாக தொழில் தொடங்க வரும் அமெரிக்க நிறுவனங்கள் மற்றும் புரிந்துணர்வு ஒப்பந்தங்கள் குறித்து விவாதிக்கப்பட்டு முடிவு எடுக்கப்படவுள்ளது. மேலும், தமிழகத்தில் புதிதாக தொடங்கப்பட உள்ள வளர்ச்சி திட்டங்கள், தற்போது நடைபெற்று வரும் பணிகளை வேகப்படுத்துவது உள்ளிட்ட பல்வேறு விஷயங்கள் குறித்தும் விவாதிக்க திட்டமிடப்பட்டுள்ளது.

The post தமிழ்நாடு முதல்வர் மு.க.ஸ்டாலின் தலைமையில் வரும் 13ம் தேதி அமைச்சரவை கூட்டம் appeared first on Dinakaran.