திருவண்ணாமலை, ஏப்.26: திருவண்ணாமலையில் அக்னி நட்சத்திரம் தொடங்கும் முன்பே 104 டிகிரி வெயில் சுட்டெரித்ததால், பொதுமக்கள் தவிப்படைந்துள்ளனர். அதனால், சாலைகளில் மக்கள் நடமாட்டம் குறைந்தது.
தமிழ்நாட்டில் இயற்கையின் சமநிலையற்ற தன்மையாலும், பருவநிலை மாற்றங்களாலும் ஆண்டுதோறும் கோடை வெயில் உச்சம் தொடுகிறது. மாநிலத்தின் பெரும்பாலான மாவட்டங்களில் 100 டிகிரியை கடந்து வெயில் சுட்டெரிக்கிறது. எனவே, வானிலை ஆய்வு மையம் வெயில் பாதிப்பு தொடர்பாக எச்சரிக்கை விடுக்கும் நிலை ஏற்பட்டுள்ளது. இந்நிலையில், அக்னி நட்சத்திரம் எனப்படும் கத்திரிவெயில் வரும் 4ம் தேதி தொடங்கி, 29ம் தேதி நிறைவடைகிறது. ஆனாலும், அக்னி நடத்திரம் தொடங்கும் முன்பே வெயில் சுட்டெரிக்க தொடங்கிவிட்டது. கடந்த ஒரு வாரமாக அக்னி நட்சத்திர வெயிலை விட மிகக்கடுமையான வெயில் சுட்டெரிக்கிறது. மேலும், கோடை காலத்தில் வெப்பத்தை தணிக்கும் வகையில் எதிர்பாராமல் பெய்யும் கோடை மழையும் இதுவரை கைகொடுக்கவில்லை. எனவே, வெயிலின் தாக்கத்தால் பொதுமக்கள் தவியாய் தவிக்கின்றனர்.
இந்நிலையில், திருவண்ணாமலையில் நேற்று கோடை வெயில் சுட்டெரித்தது. அதனால், வெயில் அளவு 104 டிகிரியாக பதிவானது. பகலில் வெயிலும், இரவில் அனல் காற்றும் வீசியது. எனவே, நேற்று பகல் 12 மணியில் இருந்து 3 மணி வரை பெரும்பாலான சாலைகளில் மக்கள் நடமாட்டம் குறைந்தது. வாகன ஓட்டிகள் எண்ணிக்கையும் வெகுவாக குறைந்தன. கடை வீதிகளில் கூட்டம் குறைந்தது. எனவே, பகலில் வியாபாரம் பெரிதும் பாதித்தது. மாலை 5 மணிக்கு பிறகே வியாபாரம் நடப்பதால், இரவு 10 மணி வரை கடை வீதிகளில் கடைகள் திறந்திருக்கும் நிலை காணப்படுகிறது. மேலும், குளிர்பானம், கரும்புச்சாறு, பழச்சாறு, ஐஸ்கிரீம், இளநீர், பனை நுங்கு போன்றவற்றின் விற்பனை அமோகமாக நடந்தது.
மேலும், திருவண்ணாமலை அண்ணாமலையார் கோயிலில் நேற்று அதிகாலை நடை திறக்கும் போது ஏராளமான கூட்டம் தரிசனத்துக்காக காத்திருந்தது. கடும் வெயில் காரணமாக, பகல் 11 மணிக்கு பிறகு, பக்தர்கள் வருகை படிப்படியாக குறைந்தது. அதன்பிறகு, மாலை 5 மணிக்கு பிறகு மீண்டும் பக்தர்கள் வருகை அதிகரித்தது. இந்நிலையில், திருவண்ணாமலை மாவட்டத்தில் தொடர்ந்து வெயில் அளவு அதிகரிக்கும் என்பதாலும், வெப்பக்காற்று வீசும் என்பதாலும், அவசியமான பணிகளை தவிர்த்து பொதுமக்கள் வெயில் நேரத்தில் வெளியில் செல்வதை தவிர்க்க வேண்டும், வெயிலால் ஏற்படும் பாதிப்புகள் குறித்த விழிப்புணர்வுடன் முன்னெச்சரிக்கையாக நடந்து கொள்ள வேண்டும் என கலெக்டர் பாஸ்கர பாண்டியன் கேட்டுக்கொண்டுள்ளார்.
The post அக்னி நட்சத்திரம் தொடங்கும் முன்பே சுட்டெரிக்கும் கோடை வெயில் சாலைகளில் மக்கள் நடமாட்டம் குறைந்தது திருவண்ணாமலையில் appeared first on Dinakaran.