திருவண்ணாமலை, மார்ச் 8: 4 வயது சிறுமியிடம் பாலியல் வன்கொடுமையில் ஈடுபட்ட 73 வயது முதியவருக்கு 7 ஆண்டுகள் சிறை தண்டனை விதித்து திருவண்ணாமலை போக்சோ கோர்ட் பரபரப்பு தீர்ப்பு அளித்தது. திருவண்ணாமலை மாவட்டம், ஆரணி அடுத்த தச்சூர் கிராமத்தை சேர்ந்தவர் சுகுமார்(73), திருமணமானவர். கடந்த 4.5.2020 அன்று, அருகிலுள்ள ஒரு பகுதியில் வீட்டுக்கு வெளியே 4 வயது சிறுமி விளையாடிக் கொண்டிருந்தார். அப்போது அந்த சிறுமியை வீட்டுக்கு அழைத்துச் சென்ற சுகுமார், பாலியல் வன்கொடுமையில் ஈடுபட்டுள்ளார். இதனால் பாதிக்கப்பட்ட சிறுமி, அழுதபடியே சென்று பெற்றோரிடம் தெரிவித்தார். அதைத்தொடர்ந்து, ஆரணி மகளிர் போலீசில் சிறுமியின் பெற்றோர் புகார் அளித்தனர். மேலும் சிறுமி மருத்துவமனையில் அனுமதிக்கப்பட்டு சிகிச்சை பெற்றார். மருத்துவ பரிசோதனையில், சிறுமியிடம் முதியவர் பாலியல் வன்கொடுமையில் ஈடுபட்டது உறுதியானது.