டெல்லி: நாடாளுமன்ற வளாகத்தில் ஆளும் கூட்டணி மற்றும் எதிர்க்கட்சி கூட்டணி எம்பிக்கள் எதிரேதிரே போராட்டம் நடத்தி வருகின்றனர். ஒன்றிய கல்வி அமைச்சர் தர்மேந்திர பிரதான் பதவி விலக எதிர்க்கட்சி எம்பிக்கள் வலியுறுத்தி போராட்டம் நடத்திய அதே நேரத்தில் ஆளும் கூட்டணி எம்பிக்களும் போராட்டம் நடத்தி வருகின்றனர். நீட் (NEET) தேர்வு வினாத்தாள் கசிவு விவகாரம் மற்றும் டெல்லியில் மாணவர்கள் மீது நடத்தப்பட்ட தடியடி ஆகியவற்றை முன்வைத்து நாடாளுமன்ற மழைக்கால கூட்டத்தொடரில் இந்த மோதல் வெடித்துள்ளது

காங்கிரஸ் எம்பி ராகுல் காந்தி, பிரியங்கா காந்தி மற்றும் அகிலேஷ் யாதவ் உள்ளிட்ட எதிர்க்கட்சித் தலைவர்கள் கருப்பு நிற உடையணிந்து நாடாளுமன்ற வளாகத்தில் போராட்டம் நடத்தினர். நீட் முறைகேட்டிற்குப் பொறுப்பேற்று மத்திய கல்வி அமைச்சர் தர்மேந்திர பிரதான் மற்றும் உள்துறை அமைச்சர் அமித் ஷா ஆகியோர் உடனடியாகப் பதவி விலக வேண்டும் என அவர்கள் வலியுறுத்தினர்

ஜூலை 21 அன்று பிரதமர் நரேந்திர மோடியின் இல்லத்தை முற்றுகையிட முயன்ற ராகுல் காந்தி உள்ளிட்ட தலைவர்கள் காவல்துறையினரால் தடுத்து நிறுத்தப்பட்டு, வலுக்கட்டாயமாக இழுத்துச் செல்லப்பட்டு கைது செய்யப்பட்டனர். இதைக் கண்டிக்கும் விதமாகவும் நாடாளுமன்றத்தில் அமளி தொடர்கிறது

எதிர்க்கட்சிகளின் இந்தத் தொடர் முழக்கங்களுக்குப் பதிலடி கொடுக்கும் வகையில், ஆளும் என்.டி.ஏ (NDA) கூட்டணி எம்பிக்கள் நாடாளுமன்றத்தின் ‘மகார் துவார்’ (Makar Dwar) பகுதியில் திரண்டு மாபெரும் பதில் ஆர்ப்பாட்டத்தில் ஈடுபட்டுள்ளனர். ராகுல் காந்தி நாடாளுமன்றக் கடமைகளில் இருந்து ஓடி ஒளிந்து கொண்டு, வேண்டுமென்றே அவையை முடக்க ரகளை செய்கிறார் என்று பாஜக குற்றம் சாட்டியுள்ளது

இந்த இருதரப்பு எதிரேதிரே முழக்கங்கள் மற்றும் கடும் வாக்குவாதங்கள் காரணமாக, மக்களவை மற்றும் மாநிலங்களவை ஆகிய இரண்டு அவைகளும் எவ்வித சுமுகமான விவாதங்களும் இன்றி அடுத்தடுத்து ஒத்திவைக்கப்பட்டு வருகின்றன