மேற்குவங்க தேர்தலில் சட்டம் ஒழுங்கு பிரச்னை ஏற்பட்டால் கடும் நடவடிக்கை: தலைமை தேர்தல் கமிஷனர் எச்சரிக்கை

கொல்கத்தா: மேற்குவங்க தேர்தலில் சட்டம் ஒழுங்கு பிரச்னை ஏற்பட்டால் கடும் நடவடிக்கை எடுக்கப்படும் என்று தலைமை தேர்தல் கமிஷனர் எச்சரித்தார். மேற்குவங்க சட்டப்பேரவை தேர்தல் ஏற்பாடுகள் தொடர்பாக தலைமை தேர்தல் கமிஷனர் ஞானேஷ்குமார், தேர்தல் கமிஷனர்கள் சுக்பீர்சிங் சந்து, விவேக் ஜோஷி அடங்கிய தேர்தல் குழுவினர் அனைத்து அரசியல்கட்சி பிரதிநிதிகளுடன் நேற்று ஆலோசனை நடத்தினர்.

அப்போது மேற்குவங்க சட்டப்பேரவை தேர்தல் நடத்துவது தொடர்பான பல்வேறு பிரச்சினைகள் குறித்து விவாதிக்கப்பட்டன. பல கட்சிகள் ஒன்று அல்லது இரண்டு கட்டங்களாக மட்டுமே தேர்தல் நடத்தப்பட வேண்டும் என்று பரிந்துரைத்தன. மேலும் தேர்தல் அமைதியாக நடைபெறுவதை உறுதி செய்வதில் தங்கள் ஒத்துழைப்பை உறுதி செய்தன. தேர்தல் நேரத்தில் சமூக விரோத சக்திகளின் செயல்பாடுகளைத் தடுக்கவும், தேர்தலின் போது வாக்காளர்களை அச்சுறுத்துவதைத் தடுக்கவும் கடுமையான நடவடிக்கைகளை எடுக்குமாறு தேர்தல் ஆணையத்தை கட்சிகள் வலியுறுத்தின.

வன்முறையைத் தடுக்கவும், வாக்காளர்கள் அச்சமின்றி வாக்களிக்க முடியும் என்பதை உறுதிப்படுத்தவும், மத்திய ஆயுதக் காவல் படைகளைப் போதுமான எண்ணிக்கையில் நிறுத்துவது உட்பட வலுவான பாதுகாப்பு ஏற்பாடுகளின் அவசியத்தை அவர்கள் வலியுறுத்தினர்.
அப்போது சட்டம் ஒழுங்கைப் பராமரிப்பதில் ஏற்படும் எந்தவொரு குறைபாடும் பொறுத்துக்கொள்ளப்படாது என்று தலைமைத் தேர்தல் கமிஷனர் ஞானேஷ் குமார் எச்சரித்தார்.

மேலும் மேற்குவங்கத்தில் போதைப்பொருள் ஆலோசனைக் குழு இல்லாத நிலை குறித்தும் அவர் கேள்வி எழுப்பினார். இதற்கு மேற்குவங்க காவல்துறை பொது இயக்குநர் (சட்டம் மற்றும் ஒழுங்கு) வினீத் கோயல் பதிலளிக்க முயன்றபோது, ​​உடனடியாக சரியான நடவடிக்கைகளை உறுதி செய்யுமாறு அறிவுறுத்தி அவரை பேசவிடாமல் தலைமை தேர்தல் கமிஷனர் தடுத்தார்.

மேலும் கலால் துறை, போதைப்பொருள் அதிகாரிகள், இந்திய விமான நிலைய ஆணையம் , இந்திய ரிசர்வ் வங்கி உள்ளிட்ட பல அமலாக்க நிறுவனங்களையும் தலைமை தேர்தல் கமிஷனர் குறை கூறினார். தேர்தல் காலத்தில் கணக்கில் காட்டப்படாத பணம் புழக்கத்தில் இருக்காமல் இருக்க மாவட்டங்கள் முழுவதும் கடுமையான கண்காணிப்பை மேற்கொள்ளுமாறு ரிசர்வ் வங்கி அதிகாரிகளுக்கு அவர் அறிவுறுத்தினார்.

* ஏன் எங்களை அழைத்தார்கள்?

மேற்குவங்கத்தில் ஆளும் திரிணாமுல் காங்கிரஸ் கட்சியின் மூத்த தலைவரும் மாநில அமைச்சருமான சந்திரிமா பட்டாச்சார்யா இந்த ஆலோசனை கூட்டம் குறித்து கூறுகையில்,’ ஆலோசனை கூட்டத்தில் நான் பேச முயற்சி செய்த போது என்னைப்பார்த்து கத்த வேண்டாம் என்று கூறினர். நான் ஒரு பெண். ஆனால் என்னிடம் கத்த வேண்டாம் என்று கூறப்பட்டது.

மக்களின் உரிமைகள் பற்றிப் பேசும்போது நான் ஏன் குரல் எழுப்பக்கூடாது? எஸ்ஐஆர் பற்றி நாங்கள் பேசும் போதெல்லாம், இந்த விஷயம் உச்ச நீதிமன்றத்தில் இருப்பதாக அவர்கள் கூறினர். அப்படியானால், அவர்கள் ஏன் எங்களை கூட்டத்திற்கு அழைத்தார்கள்? அவர்கள் எங்களை அழைத்திருக்கும்போது, ​​நாங்கள் சொல்வதை அவர்கள் கேட்க வேண்டும்’ என்றார்.

* எங்கள் மாநில அதிகாரிகளை மிரட்டுவதா?; மம்தா ஆவேசம்

முதல்வர் மம்தா கூறுகையில்,’மேற்குவங்கத்தில் நடந்த தேர்தல் ஆலோசனை கூட்டத்தில் தலைமைத் தேர்தல் கமிஷனர் ஞானேஷ் குமார் எங்கள் அதிகாரிகளை அச்சுறுத்தியுள்ளார். தைரியம் இருப்பது நல்லது, ஆனால் தவறான துணிச்சல் நல்லதல்ல என்று தலைமை தேர்தல் கமிஷனரிடம் நான் சொல்ல விரும்புகிறேன்.

எங்களுக்கு ஒரே ஒரு விஷயம் இருக்கிறது; அனைவருக்கும் வாக்களிக்கும் உரிமை வழங்கப்பட வேண்டும். அனைவருக்கும் வாக்களிக்கும் உரிமையை உறுதி செய்ய விரும்புகிறோம். ஆனால் மக்களைத் தாக்குவதன் மூலமும், அவர்களை மிரட்டுவதன் மூலமும், வாக்காளர் பட்டியலில் இருந்து பெயர்களை நீக்குவதன் மூலமும் நீங்கள் அதிகாரத்தைக் கைப்பற்ற முடியும் என்று நீங்கள் நினைத்தால், அது நடக்காது’ என்றார்.

* ஞானேஷ்குமாருக்கு கருப்பு கொடி

கொல்கத்தாவில் புகழ்பெற்ற காளிகாட் கோயிலுக்கு தலைமை தேர்தல் கமிஷனர் ஞானேஷ் குமார் சென்றபோது அங்கிருந்த மக்கள் திடீரென அவருக்கு எதிராக கோபேக் கோஷம் எழுப்பினார்கள். மேலும் கருப்பு கொடியை காட்டி எதிர்ப்பு தெரிவித்தனர். கடந்த ஞாயிற்றுக்கிழமை இரவு அவர் கொல்கத்தா விமானநிலையத்தில் வந்து இறங்கிய போதும் கருப்பு கொடி ஆர்ப்பாட்டம் நடந்தது குறிப்பிடத்தக்கது.