ஆந்திர மாநிலத்தில் போட்டியிடும் 22 பேர் உட்பட 56 வேட்பாளர்கள் அடங்கிய ஐந்தாவது வேட்பாளர் பட்டியலை காங்கிரஸ் கட்சி நேற்று வௌியிட்டுள்ளது. வருகிற மக்களவை தேர்தலில் போட்டியிடும் வேட்பாளர்களின் பெயர்கள் அடங்கிய பட்டியல்களை காங்கிரஸ் வெளியிட்டு வருகிறது. இதன்படி 5வது பட்டியலை காங்கிரஸ் கட்சி நேற்று வெளியிட்டது. கட்சியின் தலைவர் ராகுல்காந்தி தலைமையிலான காங்கிரஸ் மத்திய தேர்தல் கமிட்டி கூட்டத்திற்கு பின்னர் இந்த பட்டியல் வெளியிடப்பட்டது. ஆந்திராவில் போட்டியிடும் 22 வேட்பாளர்கள், மேற்கு வங்கத்தில் போட்டியிடும் 11 வேட்பாளர்களின் பெயர்கள் அறிவிக்கப்பட்டுள்ளது. மேலும் தெலங்கானாவில் போட்டியிடும் 8 வேட்பாளர்கள், ஒடிசா 6, அசாம் 5, மற்றும் உத்தரப்பிரதேசத்தில் போட்டியிடும் 3 வேட்பாளர்களின் பெயர்கள் இதில் அறிவிக்கப்பட்டுள்ளது. முன்னாள் ஜனாதிபதி பிரணாப் முகர்ஜியின் மகன் அபிஜித் முகர்ஜிக்கு ஜான்கிபூர் மக்களவை தொகுதியில் போட்டியிடுவதற்கு காங்கிரஸ் கட்சி வாய்ப்பு வழங்கியுள்ளது. பெர்காம்பூர் தொகுதியில் அதிர் ரஞ்சன் சவுத்ரியும், ராய்கன்ஜ் தொகுதியில் முன்னாள் அமைச்சர் பிரியா ரஞ்சன் தாஸ்முனீஸ் மனைவி தீபா தாஸ்முன்சியும் வேட்பாளர்களாக அறிவிக்கப்பட்டுள்ளனர்.