நன்றி குங்குமம் தோழி

இந்திய உணவுகளில் சமையல் எண்ணெய் முக்கிய பங்கு வகிக்கிறது. நம் அன்றாட சமையலில் எண்ணெய் ஒரு அத்தியாவசிய உணவாகும். எண்ணெயை பயன்படுத்தி உணவுப் பொருட்களை ஆழமாக வறுப்பது, வதக்குவது போன்ற எல்லா விஷயங்களையும் செய்ய முடியும்.பொரித்தது போக மிஞ்சியிருக்கும் எண்ணெயை மீண்டும் பயன்படுத்துவதால் உடலில் ஆரோக்கிய கேடுகளை உண்டாக்க வாய்ப்பு உள்ளது என்கிறார்கள் மருத்துவர்கள்.

எண்ணெயை அதன் அதிகபட்ச கொதிநிலைக்கு அதிகமாக சூடாக்கும்போது வேதியியல் மூலக்கூறுகளின் கலவை மாறி கொழுப்பு அமிலங்களை கெட்ட கொழுப்புகளாக மாற்றுகிறது. இவை நமது ஆரோக்கியத்திற்கு கேடு விளைவிக்கக்கூடியது. எண்ணெயை அதிகமாக சூடாக்குவது, செல்களில் ஆக்ஸிஜனேற்ற சேதத்தை உண்டாக்குகிறது. ஆக்ஸிஜனேற்ற அழுத்தம் என்பது ரத்தக்குழாய் தமனிகளை தடுத்து சருமத்தை சேதப்படுத்தும் புற்று நோய்க்கு வழிவகுக்கும். காய்ச்சிய எண்ணெயை திரும்ப பயன்படுத்துவதற்கு முன்பு அதன் அதிக பட்ச கொதி நிலையை அறிந்து வைத்திருப்பது நல்லது.

சூரிய காந்தி எண்ணெய் இயற்கையாகவே சூரிய காந்தி எண்ணெயில் நிறைய ஆன்டி ஆக்ஸிடன்கள் உள்ளன. இது ஆக்ஸிஜனேற்ற அழுத்தத்தை தடுக்கிறது. நோயெதிர்ப்பு சக்தியை அதிகரிக்கிறது. உடம்பில் நல்ல கொலஸ்ட்ராலை அதிகரிக்கிறது. சூரியகாந்தி எண்ணெயின் அதிகபட்ச கொதி நிலை 400 டிகிரி பாரன் ஹீட். இது ஆழமாக வறுப்பதற்கு ஏற்றது.

தேங்காய் எண்ணெய் தேங்காய் எண்ணெய் மூளை செயல்பாட்டிற்கு உதவுகிறது. வலிப்புத் தாக்கங்களை குறைத்து, நல்ல கொழுப்பு அதிகரிக்கச் செய்கிறது. தேங்காய் எண்ணெயின் அதிகபட்ச கொதி நிலை 350 டிகிரி பாரன் ஹீட். அதிக வெப்ப நிலை சமையலுக்கு ஏற்றதல்ல.

ஆலிவ் எண்ணெய்: இது எந்த வகையான சமையலுக்கும் உகந்த எண்ணெய். இதில் விட்டமின் ‘ஈ’ உள்ளது. இதன் அதிகபட்ச ெகாதி நிலை 320 டிகிரி பாரன் ஹீட். நடுத்தர வெப்பநிலை செயல்பாடுகளுக்கு சிறந்தது.

சோயா பீன்ஸ் எண்ணெய்: இது உலகில் பரவலாகப் பயன்படுத்தப்படும் தாவர எண்ணெயாகும். அத்தியாவசிய கொழுப்பு அமிலங்கள் இதில் நிறைந்து உள்ளன. இதன் கொதிநிலை 350 டிகிரி பாரன் ஹீட்.

ரைஸ் பிரான் எண்ணெய்: இதில் பாலி அன் சேச்சுரேட்டேட் மற்றும் மோனோ சேச்சுரேட்டேட் அமிலங்கள் காணப்படுகின்றன. இதன் அதிகபட்ச கொதி நிலை 490 டிகிரி பாரன் ஹீட் ஆகும்.

தொகுப்பு : வி.எம்.கிருஷ்ணவேணி, பழனி.