கூடலூர்: நீலகிரி மாவட்டம் கூடலூரை அடுத்த தேவன் எஸ்டேட் பகுதியில் கடந்த 24ம் தேதி தோட்ட தொழிலாளியை புலி அடித்து கொன்றது. இதையடுத்து, புலியை பிடிக்க கூண்டு வைக்கப்பட்டது. இந்நிலையில், புலிக்கு மயங்க ஊசி செலுத்தும் நடவடிக்கை நேற்று 4வது நாளாக நடந்தது. 26ம் தேதி மதியம் வனத்துறையினர் கண்ணில் புலி சிக்கியது. மயக்க ஊசி செலுத்த முயன்றபோது கண் இமைக்கும் நேரத்தில் உரமியபடியே வனப்பகுதிக்குள் சென்று மாயமானது. அப்போது, பலத்த மழை பெய்ததால் புலியை தேடும் பணியில் தொய்வு ஏற்பட்டது. இதைத்தொடர்ந்து, நேற்று காலை மீண்டும் புலியின் இருப்பிடத்தை கண்டுபிடிக்கும் பணியில் வனத்துறையினர் ஈடுபட்டு வருகின்றனர்.முதுமலை புலிகள் காப்பக கள இயக்குனர் வெங்கடேஷ் தலைமையில் இரண்டு இணை இயக்குனர்கள், கூடலூர் கோட்ட வன அலுவலர், 3 கால்நடை மருத்துவர்கள் மற்றும் கேரளாவில் இருந்து வயநாடு கோட்டவன அலுவலர் நரேந்திர பாபு தலைமையில் வரவழைக்கப்பட்டுள்ள சிறப்பு பயிற்சி பெற்ற 10 வனத்துறையினர் உள்ளிட்ட 90க்கும் மேற்பட்டோர் இப்பணியில் ஈடுபட்டு வருகின்றனர்.