புதுடெல்லி: அமெரிக்காவில் நடக்கும் குவாட் உச்சி மாநாடு, ஐநா பொதுச்சபை கூட்டத்தில் பங்கேற்க பிரதமர் மோடி கடந்த புதன்கிழமை காலை டெல்லியில் இருந்து தனி விமானத்தில் அமெரிக்கா சென்றார். அங்கு, அமெரிக்கா வாழ் இந்தியர்கள் அவரை உற்சாகமாக வரவேற்றனர். பின்னர், அவர்களுடன் நடந்த நிகழ்ச்சியில் மோடி பங்கேற்றார். இந்நிலையில், டெல்லியில் இருந்து விமானத்தில் சென்ற போதும், அரசு கோப்புகளை மோடி பார்த்தார். அந்த படத்தையும் டிவிட்டரில் வெளியிட்டார். இதற்கு லைக் கொடுத்துள்ள ரயில்வே இணையமைச்சர் அஸ்வினி வைஷ்ணவ், ‘நாட்டுக்காக ஓய்வறியாது உழைக்கும் தலைவர்’ என்று பாராட்டு தெரிவித்துள்ளார். மேலும், மோடி படத்துக்கு அருகில் லால்பகதூர் சாஸ்திரி விமான பயணத்தில் கோப்புகளை பார்க்கும் படத்தை வெளியிட்டு, ‘இரு தலைவர்களும் கடமையே கருத்தாக கொண்டவர்கள்,’ என்று கபில் மிஸ்ரா புகழ்ந்துள்ளார்.