பந்தலூர் : பந்தலூர் அருகே சேரம்பாடி கோரஞ்சால் வனப்பகுதியில் இரண்டு யானைகள் சண்டையிடும் காட்சியை பொதுமக்கள் செல்போனில் படம் பிடித்ததால் பரபரப்பு ஏற்பட்டது. பந்தலூர் அருகே சேரம்பாடி வனச்சரகம் கோரஞ்சால், மில்லத்நகர், சுங்கம் உள்ளிட்ட பகுதிகளில் காட்டு யானைகள் முகாமிட்டு வருகிறது. நேற்று மாலை சேரம்பாடியில் இருந்து கேரளா மாநிலம் சுல்தான்பத்தேரி செல்லும் பிரதான சாலை அருகே வனப்பகுதியில் இரண்டு யானைகள் சண்டையிட்டது. அப்போது, அந்த வழியாக சாலையில் சென்ற பொதுமக்கள், வாகன ஓட்டிகள் வாகனங்களை நிறுத்தி யானைகளை செல்போனில் படம் எடுத்தனர்.