திருவொற்றியூர்: மீஞ்சூர் அருகே விச்சூர் கிராமத்தை சேர்ந்தவர் பாலமுருகன் (43). அதே பகுதியில் லாரி டிரான்ஸ்போர்ட் நிறுவனம் நடத்தி வருகிறார். மேலும் மணலி, சிபிசிஎல் நிறுவனத்தில் இருந்து பெட்ரோலிய மூலப்பொருட்களை ஒப்பந்த அடிப்படையில் டேங்கர் லாரிகள் மூலம் எடுத்து சென்று, அனைத்து மாநிலங்களுக்கும் சப்ளை செய்து வருகிறார். கடந்த 2 நாட்களுக்கு முன் கொடுங்கையூரை சேர்ந்த இம்ரான் (45), இப்ராகிம் (42) ஆகிய இருவரும் பாலமுருகனை தொலைபேசியில் தொடர்புகொண்டு, ‘லோடு ஏற்றிச் செல்ல லாரி வேண்டும். அது சம்பந்தமாக பேச, மாதவரத்துக்கு வாங்க,’ என அழைத்துள்ளனர். அதன்படி, பாலமுருகனும் மாதவரத்துக்கு சென்றுள்ளார். மாதவரம் ரவுண்டானா அருகே சம்பந்தப்பட்ட இருவருடன் பாலமுருகன் பேசிக்கொண்டிருந்தார். அப்போது திடீரென பாலமுருகனின் கழுத்தில் கத்தியை வைத்து, ‘எங்களுக்கு 3 லட்சம் வேண்டும். அதை கொடுத்தால் விட்டுவிடுகிறோம். இல்லையேல் உன்னை இங்கிருந்து கடத்தி சென்றுவிடுவோம்,’ என்று இருவரும் மிரட்டியுள்ளனர்.