மும்பை: அமெரிக்க துணை அதிபர் கமலா ஹாரிசின் வெற்றிக்கு எனது மருமகளுக்கும் பங்குண்டு என்று பாலிவுட் நடிகர் சத்ருகன் சின்ஹா தெரிவித்துள்ளார். பாலிவுட் நடிகரும், பாஜக முன்னாள் எம்பியும், தற்போதைய காங்கிரஸ் மூத்த தலைவர்களில் ஒருவரான சத்ருகன் சின்ஹா, அமெரிக்க துணை அதிபராக தேர்வான இந்திய வம்சாவளியைச் சேர்ந்த கமலா ஹாரிசுடன், தனது குடும்பத்தினருக்கு தொடர்பு இருப்பதாக டுவிட் செய்துள்ளார். அந்த டுவிட்டரில், கமலா ஹாரிசின் புகைப்படத்துடன் அவரது மருமகள் ப்ரீதா சின்ஹா இருப்பது போன்ற புகைப்படத்தை பதவிட்டுள்ளார். அவரது டுவிட்டில், ‘மனமார்ந்த வாழ்த்துக்கள்! ஜோ பிடனின் அற்புதமான மற்றும் எதிர்பார்க்கப்பட்ட வெற்றியை உலகமே கொண்டாடுகிறது. அதேபோல், கமலா ஹாரிசின் வெற்றியும் மிகவும் எதிர்பார்க்கப்பட்டது என்பதை நாம் மறந்துவிடக் கூடாது’ என்று தெரிவித்துள்ளார்.