புதுக்கோட்டை: புதுக்கோட்டை மாவட்டத்தில் திருட்டை தடுக்க இரவு நேரங்களில் போலீசார் ரோந்து சென்று அதிரடி சோதனை நடத்துகின்றனர். இதேபோல் ஆலங்குடி அருகே கீரமங்கலம் பகுதிகளில் போலீசார் பைக்குகளில் ரோந்து பணியில் ஈடுபடுகின்றனர். அவ்வாறு ரோந்து வரும் 2 போலீசார், கீரமங்கலம் பகுதியில் உள்ள தண்ணீர் பந்தலில் தாகத்துக்காக வைக்கப்பட்டுள்ள தண்ணீர் பானையில் உள்ள டம்ளரை திருடி செல்லும் வீடியோ காட்சி அங்குள்ள சிசிடிவி கேமராவில் பதிவாகியுள்ளது. இது தற்போது சமூக வலைதளங்களில் வைரலாக பரவி வருவது பரபரப்பை ஏற்படுத்தியுள்ளது. அந்த சிசிடிசி கேமராபதிவில், இரவு நேரத்தில் இரண்டு போலீசார் ஒரு பைக்கில் வருகின்றனர். அவர்கள் கடைமுன் பைக்கை நிறுத்துகின்றனர். ஒருவர் பைக்கில் உட்கார்ந்திருக்க மற்றொரு போலீஸ்காரர் கடையில் உள்ள குடிநீர் பானையிலிருந்த டம்ளரை எடுத்துக்கொண்டு பைக்கில் ஏறுகிறார்.