விஸ்வாசம் - விமர்சனம்

சத்ய ஜோதி ஃபிலிம்ஸ் தயாரிப்பில் சிவா இயக்கத்தில் அஜித், நயன்தாரா, விவேக், ஜகபதி பாபு, ரோபோ ஷங்கர், தம்பி ராமையா உள்ளிட்ட பலர் நடிப்பில் வெளியாகியுள்ள படம் ‘விஸ்வாசம்‘. மெடிக்கல் கேம்ப் நடத்த கொடுவிலார் பட்டி கிராமத்திற்கு குழுவாக வருகிறார் மருத்துவர் நிரஞ்சனா(நயன்தாரா). வரும்போதே கிராமத்தில் யாருக்கு பிரச்னை என்றாலும் வரிந்து கட்டிக்கொண்டு சண்டைக்குப் போகும் தூக்குதுரையால்(அஜித்) நிரஞ்சனாவின் வண்டி தாக்குதல்களை சந்திக்கிறது. நிரஞ்சனா வழக்குப் போடுகிறார். ஆனால் மீண்டும் நடக்கும் சம்பவங்களால் கேஸை வாபஸ் வாங்க நேரிடுகிறது.

பார்த்தவுடன் காதல் , கல்யாணம், அழகான பெண் குழந்தை என்னும் வாழ்க்கையில் தூக்குதுரையின் வம்புக்குச் செல்லும் குணத்தால் ஆபத்து வருகிறது. இருவரும் பிரிகிறார்கள். முடிவு என்ன என்பது மீதிக்கதை. அஜித் சிரித்தால் கைதட்டல் , நடந்தால் கைதட்டல், வந்தாலே கைதட்டல் என ரசிகர்கள் எப்போதும் போல்  கொண்டாடுவதற்கு ஏற்ப மனிதரிடம் இன்னமும் அந்த ஸ்கிரீன் பிரசன்ஸை அடித்துக்கொள்ள ஆளே இல்லை. குளோசப் காட்சிகளில் கொஞ்சம் மேக்கப் டச்சப் செய்திருக்கலாமோ என சின்ன நெருடல்.

நயன்தாரா ‘நீங்க பேரழகு‘ என அஜித்தே சொல்லுமளவுக்கு உண்மையாகவே பேரழகியாக ஆண்களுக்கு ஆச்சர்யமும், பெண்களுக்கு பொறாமையும் ஏற்படுத்திவிடுகிறார். மேக்கப், லுக், கெத்து என நயன்தாராவின் உடைகள் மீண்டும் டிரெண்டாகலாம்.  ‘நான் தனியா இருக்கறதாலதான் உயரத்துல இருக்கேன்‘ இது கதைக்கா இல்லை சொந்த வசனாம என புரியவில்லை எனினும் லேடி சூப்பர் ஸ்டாருக்காகவே எழுதப்பட்டது போன்ற உணர்வு. பேரு தூக்குதுரை, பொண்டாட்டி பேரு நிரஞ்சனா…. ‘,‘ஏறி மிதிச்சேன் மூச்ச கூட வாங்க முடியாது‘, ‘பொண்டாட்டிக்கு என் மேல  கோவம், புள்ளைக்கு ஏன் மேல வெறுப்பு என் கதைல நான் வில்லன்டா‘ இப்படி படத்தில் அஜித்துக்காகவே பன்ச்கள் பலம் , மேலும் அஜித்தின் மதுரை பாஷை மெனெக்கெடலுக்கு பாராட்டுகள்.

ஆனாலும் வசனங்களை பொறுமையாக நிறுத்தி நிதானமாக பேசி முடிப்பதற்குள் சார் அடுத்த சீன் வெயிட்டிங் சீக்கிரம் முடிங்க எனச் சொல்லத் தோன்றுகிறது. ஓபனிங் இன்ட்ரோ, ஆக்‌ஷன் காட்சிகள் என இமானின் பின்னணி மாஸ் ரகம் ‘வேட்டிக்கட்டு‘ , ‘அடிச்சுத் தூக்கு‘ ரசிகர்கள் ஸ்பெஷல் என்றாலும் இன்னும் கொஞ்சம் மெனெக்கெட்டிருக்கலாம். மிகச் சாதாரண கதை, மிகச்சாதாரண வில்லன் என்பதாலோ ‘சிவா+ அஜித்’ கூட்டணி பலமிழந்துவிட்டதோ எனத் தோன்றுகிறது. எனினும் ‘விவேகம்‘, ‘வேதாளம்‘ படங்களைக் காட்டிலும் இதில் திரைக்கதை மற்றும் சமூகத்திற்கான கருத்துகளில் ஆச்சர்யமான முன்னேற்றம்.

ஹீரோவுடன் எப்போதும் ஒட்டிக்கொண்டிருக்கும் இரண்டு காமெடிக் கேரக்டர்கள், படத்தின் பின்பாதியில் திடீரென வரும் பெரிய காமெடியன், கலர்ஃபுல் காட்சியமைப்புகள், என கமர்சியல் படத்திற்கான அத்தனை அம்சங்களும் படத்தில் சோடையே சொல்லாத அளவிற்கு உள்ளன. மேலும் சில இடங்களில் தெலுங்கு பட ஸ்டைலும் தெரிகிறது. குடும்ப பந்தம் , மனைவி பாசம், மகள் சென்டிமென்ட் என பொங்கல், திருவிழா , குடும்ப ஆடியன்ஸை பக்காவாக டார்கெட் செய்திருக்கிறது. மேலும் படத்தில் வில்லனை கூட பெரிய அளவில் டேமேஜ் செய்யாமல் அதையும் போகிற போக்கில் விட்டுவிடுவதெல்லாம் எம்.ஜி.ஆர் கால தந்திர ஸ்டைல்.  பாராட்டுகள்.

ஆனாலும் ‘பில்லா‘ ,‘மங்காத்தா‘, என அஜித் என்றாலே ஸ்டைலிஷ் ஹேண்ட்சம் ஹீரோவாகக் காட்டிய படங்கள் இல்லாத குறை இந்தப்படத்திலும் தீரவே இல்லை. அதற்கு ‘தல‘ தரப்பு ஆவண செய்தால் நன்றாக இருக்கும். தேனியின் செழிப்புமிகு பகுதிகள், கலர்ஃபுல்லான பாடல்கள், மும்பையின் ஆக்‌ஷன் காட்சிகள் என ஒரே படத்தில் இரண்டு வேறு டோன்களை அருமையாக காட்சி படுத்தி கொடுத்திருக்கும் ஒளிப்பதிவாளர் வெற்றிக்கு உண்மையில் வெற்றிதான். மொத்தத்தில் குடும்பங்களாக கொண்டாட இந்தப் பொங்கலுக்கு என்னப்பா இருக்கு என கேட்டால் யோசிக்காமல் ‘விஸ்வாசம்‘ படத்திற்கு வழி காட்டலாம்.

× RELATED இந்தியில் ரீமேக் ஆகும் காஞ்சனா