மதுரை : கனடாவைச் சேர்ந்த ஜக்கரியா பரா என்பவர் மீதான வழக்கை ரத்து செய்து உயர்நீதிமன்ற மதுரை கிளை உத்தரவு பிறப்பித்துள்ளது. பாஸ்போர்ட் விதிகளின் கீழ் பொய்யான ஆவணங்களை அளித்து விசா பெற்றதாக ஜக்கரியா பரா கைது செய்யப்பட்டார். அவர் மீது காவல்துறை வழக்குப்பதிவு செய்தது. இதையடுத்து, தன் மீதான வழக்கை ரத்து செய்து தன்னை தாய் நாட்டுக்கு அனுப்பக் கோரி கனடாவைச் சேர்ந்த ஜக்கரியா பரா என்பவர் உயர்நீதிமன்ற மதுரைக் கிளையில் மனு தாக்கல் செய்தார்.

மேற்கண்ட வழக்கு இன்று உயர்நீதிமன்ற அமர்வில் விசாரணைக்கு வந்தது. அப்போது இரு தரப்பு வாதங்களுக்கு பின்னர் நீதிபதிகள் பிறப்பித்த உத்தரவில், “வெளிநாட்டைச் சேர்ந்த ஒருவர் மீது வழக்குப்பதிவு செய்து 16 ஆண்டு நிலுவையில் வைப்பது ஏற்கத்தக்கது அல்ல. இனி வழக்கை தொடர்வது சட்ட துஷ்பிரயோகம் செய்வதாக இருக்கும். வழக்கில் தாக்கல் செய்த குற்றப்பத்திரிகை ஏற்கத்தக்கது அல்ல.எனவே கனடாவைச் சேர்ந்த ஜக்கரியா பரா என்பவர் மீதான வழக்கை ரத்து செய்ய உத்தரவிடுகிறோம், “இவ்வாறு தெரிவித்து வழக்கை முடித்து வைத்தனர்.

The post வெளிநாட்டைச் சேர்ந்த ஒருவர் மீது வழக்குப்பதிவு செய்து 16 ஆண்டு நிலுவையில் வைப்பது ஏற்கத்தக்கது அல்ல : நீதிபதிகள் காட்டம் appeared first on Dinakaran.