கோத்தகிரி : கோத்தகிரி அருகே உள்ள கொடநாடு காட்சி முனையில் விடுமுறையையொட்டி அங்கு நிலவும் இதமான காலநிலையை அனுபவிக்க சுற்றுலா பயணிகள் குவிந்துள்ளனர். செல்பி எடுத்து மகிழ்ந்தனர்.உலகப் புகழ்பெற்ற சுற்றுலாத்தளங்களில் ஒன்றான நீலகிரி மாவட்டம் மிகச்சிறந்த சுற்றுலா தளம் ஆகும். இதில் கொடநாடு காட்சிமுனைக்கு தனி சிறப்பு உள்ளது.

இந்த காட்சி முனையை கண்டு ரசிக்க தமிழகத்தில் மட்டுமல்லாமல் கேரளா, கர்நாடகா உள்ளிட்ட வெளி மாநிலங்கள் மற்றும் வெளிநாடுகளில் இருந்தும் ஏராளமான சுற்றுலா பயணிகள் இங்கு வருகின்றனர்.

இங்கு அமைந்துள்ள ஆழமான பள்ளத்தாக்குகள், ராக் பில்லர், பச்சை பசேல் என காட்சியளிக்கும் அடர்ந்த வனப்பகுதிகளையும், அதன் நடுவில் வசிக்கும் பழங்குடியினர் மற்றும் தெங்குமரடா, கல்லம்பாளையம் உள்ளிட்ட குக்கிராமங்களையும், தமிழகத்தின் முக்கிய அணைகளில் ஒன்றான பவானிசாகர் அணை மட்டுமல்லாமல் கர்நாடக மாநிலத்தின் குண்டல்பேட், அங்களா உள்ளிட்ட பகுதிகளையும் கண்டு ரசித்து செல்வது வழக்கம்.

அதேபோல் வார விடுமுறையையொட்டி ஏராளமான சுற்றுலா பயணிகள் இங்கு வந்து செல்கின்றனர்.இந்நிலையில், கொடநாடு பகுதியில் கடந்த வாரம் முதலே குளு குளு காலநிலை நிலவியது.

தமிழகம், கர்நாடகா ஆகிய இரு மாநில எல்லைப் பகுதிகளில் உள்ள மலை முகடுகளின் நடுவில் உருவான அடர்ந்த வெண் படலம் சூழ்ந்த அடர்ந்த மேகமூட்டங்கள் மலைகளின் மீது தவழ்ந்து செல்வதை சுற்றுலா பயணிகள் மெய் மறந்து வியப்புடன் கண்டு ரசித்தனர்.இந்த ரம்மியமான காட்சிகளை சுற்றுலா பயணிகள் கண்டு ரசித்தது மட்டுமல்லாமல் செல்பி மற்றும் புகைப்படங்கள் எடுத்து மகிழ்ந்தனர்.

The post விடுமுறையையொட்டி கொடநாடு காட்சி முனையில் சுற்றுலா பயணிகள் குவிந்தனர் appeared first on Dinakaran.