காஞ்சிபுரம் அருகில் உள்ள செவிலிமேடு பாலாற்றின் குறுக்கே சுமார் 17 ஆண்டுகளுக்கு முன்பு மேம்பாலம் கட்டப்பட்டது. இந்த மேம்பாலத்தின் வழியாக செய்யாறு, ஆரணி, திருவண்ணாமலை, வந்தவாசி, திண்டிவனம், விழுப்புரம், திருச்சி, சேலம், மதுரை, புதுச்சேரி உள்ளிட்ட பல்வேறு ஊர்களுக்கு செல்லும் பேருந்துகளும் இந்த மேம்பாலத்தின் வழியாகவே செல்கின்றன.
மேலும், புஞ்சை அரசன்தாங்கல், அப்துல்லாபுரம், தூசி, மாமண்டூர், நத்தக்கொல்லை, பல்லாவரம், அய்யங்கார்குளம், வெம்பாக்கம், கோளிவாக்கம் கூழமந்தல், ஆக்கூர் உள்ளிட்ட 100க்கும் மேற்பட்ட கிராமங்களை சேர்ந்த பொதுமக்கள், நெசவாளர்கள் ஆகிய அனைவரும் மருத்துவம், கல்வி உள்ளிட்ட அனைத்து அத்தியாவசிய பணிகளுக்கும் காஞ்சிபுரத்தை நம்பியே உள்ளதால், அதிகளவில் டூவீலர்களில் வந்து செல்கின்றனர். காஞ்சிபுரம் – வந்தவாசி சாலையில் மாங்கால் கூட்டு சாலையில் சிப்காட் அமைந்துள்ளது. இங்கு எண்ணற்ற பன்னாட்டு, உள்நாட்டு தொழிற்சாலைகள் அமைந்துள்ளன. இந்த தொழிற்சாலைகளுக்கு ஆட்களை ஏற்றிக்கொண்டு வரும் வாகனங்கள், கனரக வாகனங்கள் அதிகளவில் இந்த மேம்பாலத்தை கடந்து செல்ல வேண்டும்.
நேற்று மாலை முன்னால் டூவீலரில் சென்ற நபர் நிலை தடுமாறி கிழே விழாமல் இருக்கு பிரேக் போட்ட நிலையில், தொடர்ந்து வந்த கனரக லாரி வேகத்தை குறைக்க அதன்பின் வந்த லாரி மோதி விபத்து ஏற்பட்டது. இதனால், பாலாற்றின் இருபுறமும் சுமார் 3 கி.மீ தூரத்திற்கும் மேலாக பள்ளி பேருந்துகள், தொழிலாளர்களை ஏற்றிவந்த வாகனங்கள் என ஏராளமான வாகனங்கள் அணிவகுத்து நின்றதால் சுமார் 1 மணி நேரத்திற்கும் மேலாக போக்குவரத்து பாதிப்பு ஏற்பட்டது. இதனைத்தொடர்ந்து காஞ்சிபுரம் தாலுகா போலீசார் சம்பவ இடத்திற்கு சென்று, விபத்துள்ளான லாரிகளை அப்புறப்படுத்தி போக்குவரத்தை சரிசெய்தனர். இதனால், அப்பகுதியில் சுமார் 2 மணி நேரம் போக்குவரத்து பாதிப்பு ஏற்பட்டதால் பெரும் பரபரப்பு நிலவியது.
மக்கள் தொகை அதிகரிப்பு, வாகனங்களின் பெருக்கத்திற்கேற்ப செவிலிமேடு பாலாற்றில் புதிய மேம்பாலம் கட்ட வேண்டும் என்ற கோரிக்கை எழுந்துள்ளது. இந்த பாலாறு மேம்பாலத்தை தினந்தோறும் சுமார் 10 ஆயிரத்திற்கும் மேற்பட்ட வாகனங்கள் கடந்து செல்கிறது. இதனால், தேவைக்கேற்ற 4 வாகனங்கள் சென்று வரும் வகையில் புதிதாக மேலும் ஒரு மேம்பாலம் கட்ட வேண்டும் என்ற கோரிக்கை எழுந்துள்ளது.
The post செவிலிமேடு மேம்பாலத்தில் லாரிகள் மோதி விபத்து: 2 மணி நேரம் போக்குவரத்து பாதிப்பு appeared first on Dinakaran.