புதுச்சேரி, செப். 20: மக்களுக்கு பணியாற்றிக் கொண்டு இருக்கும்போது பதவியை ராஜினாமா செய்ய வேண்டிய அவசியம் இல்லை என கவர்னர் தமிழிசை கூறினார். புதுச்சேரி ஆலங்குளம் அரசு தொடக்கப்பள்ளி மற்றும் அரசு உயர்நிலைப் பள்ளியைப் கவர்னர் தமிழிசை நேற்று ஆய்வு செய்தார். அங்கு மாணவர்களோடு கலந்துரையாடி அவர்களுடன் சேர்ந்து ஸ்மார்ட் வகுப்பறையைக் கவனித்தார். பின்னர் டெங்கு கொசு ஒழிப்பு குறித்த விழிப்புணர்வு நாடகத்தை அரங்கேற்றிய மாணவர்களை பாராட்டினார். தொடர்ந்து அங்கு வைக்கப்பட்டிருந்த மதிய உணவை மாணவர்களுக்கு வழங்கினார்.

பின்னர் கவர்னர் தமிழிசை கூறுகையில், டெங்கு கொசு ஒழிப்பு குறித்த விழிப்புணர்வு மாணவர்கள் ஏற்படுத்தும்போது அது மக்களுக்கு நன்றாக சென்றடையும். பெண்களுக்கு 33 சதவீத இட ஒதுக்கீடு வழங்க பிரதமர் தலைமையில் நேற்று நடந்த அமைச்சரவைக் கூட்டத்தில் முடிவு செய்யப்பட்டுள்ளது. இது பல பெண்கள் பொதுவாழ்க்கைக்கு வருவதற்கும், சமுதாயம் பயனடையவும், பலனடையவும் மிகுந்த உதவியாக இருக்கும். சுதந்திரம் அடைந்து 75 ஆண்டுகள் கழித்து, வாக்காளர்களில் ஏறக்குறைய 50 சதவீதம் இருக்கும் பெண்களுக்கு 33 சதவீத இடஒதுக்கீடு நடைமுறைக்கு வந்தால் புதுச்சேரி மாநிலத்தில் 11 சட்டமன்ற உறுப்பினர்களும் தமிழகத்தில் 77 சட்டமன்ற உறுப்பினர்களும் பெண்களாக இருப்பார்கள். தமிழகத்தில் 13 பெண்கள் பாராளுமன்ற உறுப்பினர்களாக இருப்பார்கள். இது மிகப்பெரிய வாய்ப்பு. அதற்காக பிரதமருக்கு நன்றி தெரிவித்துக் கொள்கிறேன்.

துணைநிலை ஆளுநராக உண்மையாக மக்களுக்காக பணியாற்றிக் கொண்டிருக்கிறேன். பெண்களுக்கான உதவித்தொகை குறித்து, என்னிடம் வரும் கோப்புகளின் அடிப்படையிலும், அதிகாரிகளிடம் இருந்து கிடைக்கும் தகவல்களின் அடிப்படையிலும் கூறுகிறேன். அதற்காக பதவியை ராஜினாமா செய்ய வேண்டிய அவசியம் இல்லை. ஆளுநராக மக்கள் பணியை தான் செய்து கொண்டிருக்கிறேன். அந்த மாணவ-மாணவிகள் பிரதமருக்கு நேற்று நன்றி கடிதம் எழுதி இருக்கிறார்கள். புதுச்சேரியில் உள்ள ஆசிரியர்கள் எந்த அளவிற்கு பயிற்சி கொடுத்தார்கள் என்று அதில் பேசியிருக்கிறார்கள். அரசு மருத்துவமனைகளும் அரசு பள்ளிகளும் சாமானிய மக்களுக்கு பலன்தர வேண்டும் என்பது என்னுடைய அடிப்படையான ஆசை என்றார்.

The post மக்களுக்கு பணியாற்றிக்கொண்டு இருக்கிறேன் பதவியை ராஜினாமா செய்ய வேண்டிய அவசியம் இல்லை appeared first on Dinakaran.