கோவை, செப். 11: கோவை வஉசி பூங்கா அருகே நேரு விளையாட்டு அரங்கம் உள்ளது. இந்த விளையாட்டு அரங்கில் உள்ள கால்பந்து மைதானத்தை சுற்றி ஓட்டப்பந்தயம் நடத்த 400மீ தூரத்திற்கு சிந்தடிக் ஓடுதளம் உள்ளது. இந்த ஓடுதளம் கடந்த 2008-ல் அமைக்கப்பட்டது. இந்த ஓடுதளம் சேதமடைந்தது காணப்பட்டது. இதையடுத்து, ஓடுதளம் சீரமைக்க அரசு சார்பில் நடவடிக்கை எடுக்கப்பட்டது. அதன்படி, கடந்த ஆண்டு நேரு விளையாட்டு அரங்கில் புதிய ஓடுதளம் அமைக்க ரூ.6.55 கோடியை தமிழ்நாடு அரசு ஒதுக்கியது. தவிர, இருக்கைகளை புதுப்பிக்கவும், கழிப்பறைகள் கட்டவும் ரூ.65 லட்சம் ஒதுக்கீடு செய்யப்பட்டது.
இப்பணியை விளையாட்டு துறை அமைச்சர் உதயநிதி ஸ்டாலின் கடந்த டிசம்பர் மாதம் அடிக்கல் நாட்டி துவக்கி வைத்தார். இதனை தொடர்ந்து மைதானத்தில் இருந்த பழைய சிந்தடிக் ஓடுதளம் அகற்றப்பட்டது. இந்த பணிகள் இரண்டு மாதத்திற்கு மேல் நடந்தது. பின்னர், புதிய தார் சாலை அமைக்கும் பணிகள் மேற்கொள்ளப்பட்டன. இந்த பணிகள் முடிந்த நிலையில், தார் சாலையின் மீது சிந்தடிக் தளம் அமைக்கும் பணிகள் மேற்கொள்ளப்பட்டன. இந்த பணிகள் தற்போது இறுதி கட்டத்தை எட்டியுள்ளது. மழைக்காலம் துவங்குவதற்குள் பணிகள் முடிக்க திட்டமிடப்பட்டு உள்ளதாக அதிகாரிகள் தரப்பில் தெரிவித்தனர்.
The post கோவை நேரு ஸ்டேடியம் சீரமைக்கும் பணிகள் தீவிரம் appeared first on Dinakaran.