நாமக்கல், டிச.16: நாமக்கல் அரசு மருத்துவமனையில், ஹீமோபிலியா நோய்க்கான சிறப்பு சிகிச்சை மையம் துவங்கப்பட்டுள்ளது. நாமக்கல் அரசு மருத்துவ கல்லூரி மருத்துவமனையில், ரத்தம் உறையும் தன்மையில்லாத ஹீமோபிலியா நோய்க்கான சிகிச்சை மையம் துவக்க நிகழ்ச்சி, முதல்வர் சாந்தா அருள்மொழி தலைமையில் நேற்று நடைபெற்றது. இதனை கலெக்டர் ஸ்ரேயா சிங் திறந்து வைத்து, குளிர்சாதனப் பெட்டியில் வைக்கப்பட்டுள்ள ₹1 கோடியே 22 லட்சம் மதிப்பிலான மருந்துகளை பார்வையிட்டார். மேலும் நோயாளிகளுக்கு ஊசி மூலம் செலுத்துவதற்காக மருந்துகளை செவிலியரிடம் வழங்கினார். மனித உடலில் குருதி (ரத்தம்) உறையாமல் போகும் பரம்பரை நோயான ஹீமோபிலியா நோய் பாதிப்பு, நாமக்கல் மாவட்டத்தில் 5 பெண்கள், 15 குழந்தைகள் உட்பட மொத்தம் 76 பேருக்கு உள்ளது. இவர்கள் சிகிச்சைக்காக ஒவ்வொரு முறையும், சேலம் மோகன் குமாரமங்கலம் அரசு மருத்துவக்கல்லூரி மருத்துவமனைக்கு சென்று வந்தனர்.