நன்றி குங்குமம் டாக்டர்

“சிரோசிஸ்” (Cirrhosis) என்ற வார்த்தையைக் கேட்டவுடன், பலரின் மனதில் வயதானவர், நீண்டகாலமாக மது அருந்தியவர் என்ற உருவமே தோன்றும். ஆனால், 20-களின் இறுதியிலோ அல்லது 30 வயதிலோ இருக்கும் இளைஞருக்கே இந்த நோய் இருப்பதாகக் கண்டறியப்படலாம் என்று பலர் நினைப்பதில்லை. ஆனால், கடந்த சில ஆண்டுகளாக ஸ்கேன் அறையில் நான் அடிக்கடி பார்த்து வரும் உண்மை இதுதான் என்கிறார் ஆர்த்தி ஸ்கேன்ஸ் – லேப்ஸின் நிர்வாக இயக்குநர் மற்றும் கதிரியக்க நிபுணர் மருத்துவர் பிரசன்னா. இதுகுறித்து மேலும் அவர் நம்முடன் பகிர்ந்து கொண்டவை.

கதிரியக்க நிபுணராக (Radiologist) நான் பார்க்கும் ஒவ்வொரு ஸ்கேனும் ஒரு கதையைச் சொல்கிறது. சில முடிவுகள் நாம் எதிர்பார்த்ததையே உறுதிப்படுத்துகின்றன. ஆனால் சில ஸ்கேன்கள், பல ஆண்டுகளாக எந்த அறிகுறியும் இல்லாமல் உடலுக்குள் அமைதியாக வளர்ந்த நோய்களை வெளிச்சத்துக்குக் கொண்டு வருகின்றன.

கடந்த பத்து ஆண்டுகளில் நான் கவனித்த மிகப்பெரிய மாற்றங்களில் ஒன்று, இளம் வயதினரிடையே தீவிரமான கல்லீரல் பாதிப்புகள் அதிகரித்து வருவதாகும். தொழில் வாழ்க்கையில் முன்னேறிக்கொண்டிருக்கும் இளைஞர்கள், குடும்பத்தை கவனிக்கும் பெற்றோர், தங்களை முழுமையாக ஆரோக்கியமாகவே கருதுபவர்கள் இவர்கள் பலரும் சாதாரண பரிசோதனைக்காக ஸ்கேன் செய்ய வருகிறார்கள். ஆனால், அவர்கள் எதிர்பார்க்காத ஒரு அதிர்ச்சித் தகவலுடன் வெளியேறுகிறார்கள்.

இளம் வயதில் முதுமையடையும் கல்லீரல்

சிரோசிஸ் என்றால் அது மதுபானம் அருந்துவதால் மட்டுமே ஏற்படும் என்ற தவறான நம்பிக்கை இன்னும் பலரிடம் உள்ளது. உண்மையில், அதிகப்படியான மது அருந்துவது முக்கிய காரணிகளில் ஒன்றாக இருந்தாலும், அது மட்டுமே காரணமல்ல.இன்றைய வாழ்க்கை முறைதான் இளம் தலைமுறையில் கல்லீரல் நோய்கள் அதிகரிக்க முக்கிய காரணமாக உள்ளது. நீண்ட நேர வேலை, ஆரோக்கியமற்ற உணவுப் பழக்கம், பதப்படுத்தப்பட்ட உணவுகள், சர்க்கரை அதிகமுள்ள பானங்கள், உடற்பயிற்சி இல்லாமை, உடல் பருமன், நீரிழிவு, அதிக கொலஸ்ட்ரால் போன்றவை கொழுப்புக் கல்லீரல் (Fatty Liver) நோயை உருவாக்குகின்றன.

பலர் இதை சாதாரண பிரச்னையாக அலட்சியப்படுத்துகிறார்கள். ஆனால், சிகிச்சையின்றி விட்டால் அது மெதுவாக கல்லீரலில் அழற்சி, நிரந்தர தழும்புகள் (Scarring) மற்றும் இறுதியில் சிரோசிஸாக மாறும் அபாயம் உள்ளது.மேலும், ஹெபடைட்டிஸ் பி மற்றும் ஹெபடைட்டிஸ் சி வைரஸ் தொற்றால் கல்லீரல் பாதிக்கப்படும் நோயாளிகளையும் தொடர்ந்து காண்கிறோம். இந்த தொற்றுகள் பல ஆண்டுகள் எந்த அறிகுறியும் இல்லாமல் இருப்பதால், கல்லீரல் கடுமையாக சேதமடைந்த பிறகே பலருக்கு அது தெரியவருகிறது.

என்னை அதிகம் கவலைப்பட வைப்பது நோயின் தீவிரம் மட்டுமல்ல; அதை நாம் கண்டறியும் வயதும் தான். பல நோயாளிகள் வெறும் 30 வயதிலேயே இந்த நிலையில் இருக்கிறார்கள். குடும்பத்திற்காக உழைக்கும், தொழிலில் முன்னேறும், எதிர்காலத்தைத் திட்டமிடும் வயதில் இத்தகைய நோய் அவர்களைத் தாக்குகிறது.

ஸ்கேன் அறையில் நான் காணும் காட்சிகள்

பல நோயாளிகளின் கதையும் ஒரே மாதிரியாக இருக்கும்.சிலர் வயிற்று அசௌகரியம், சோர்வு, வயிறு உப்புசம் அல்லது கல்லீரல் செயல்பாட்டு ரத்தப் பரிசோதனையில் ஏற்பட்ட மாற்றங்கள் காரணமாக அல்ட்ராசவுண்ட் ஸ்கேன் செய்ய வருகிறார்கள். சிலர் இதை சாதாரண அஜீரணம் அல்லது அமிலத்தன்மை என்று நினைக்கிறார்கள். இன்னும் சிலருக்கு எந்த அறிகுறியும் இருக்காது; வழக்கமான உடல்நலப் பரிசோதனையின் ஒரு பகுதியாகவே ஸ்கேன் செய்கிறார்கள்.

சிலரிடம் கொழுப்புக் கல்லீரலை ஆரம்ப நிலையிலேயே கண்டுபிடிக்க முடிகிறது. அந்த நிலையில் வாழ்க்கை முறையை மாற்றினால் கல்லீரலை மீண்டும் ஆரோக்கியமாக்க முடியும்.ஆனால், சிலரின் ஸ்கேன் மிகவும் கவலைக்கிடமான நிலையை காட்டுகிறது. கல்லீரல் சுருங்கியிருக்கும்; அதன் மேற்பரப்பு சீரற்றதாக இருக்கும். ரத்த நாளங்கள் பெரிதாகி இருக்கும். வயிற்றில் திரவம் சேரத் தொடங்கியிருக்கும். இவை அனைத்தும் பல ஆண்டுகளாக நோய் அமைதியாக முன்னேறி வந்ததற்கான அறிகுறிகள்.

அப்போது நோயாளிகள் என்னிடம் அடிக்கடி கேட்கும் கேள்வி:

“டாக்டர்… எனக்கு வயது 30 தான். எனக்கு எப்படி இது வந்தது?” என்று என் பதில் மிகவும் எளிமையானது…கல்லீரல் உங்கள் வயதைப் பார்த்து செயல்படாது; உங்கள் வாழ்க்கை முறையையும், ஆபத்து காரணிகளையும் பார்த்துத்தான் செயல்படும். அந்த ஆபத்துகள் இளம் வயதிலேயே தொடங்கினால், கல்லீரல் பாதிப்பும் அதே வயதிலேயே தொடங்கிவிடும்.

ஆரம்ப நிலையிலேயே கண்டறிவது ஏன் அவசியம்?

நல்ல செய்தி என்னவென்றால், எல்லா கல்லீரல் நோய்களும் சிரோசிஸாக மாற வேண்டிய அவசியமில்லை.ஆரம்ப நிலையிலேயே கண்டறிந்தால், கொழுப்புக் கல்லீரல் மற்றும் பல நாள்பட்ட கல்லீரல் நோய்களை வாழ்க்கை முறை மாற்றம், சரியான மருத்துவ சிகிச்சை மற்றும் தொடர்ச்சியான கண்காணிப்பு மூலம் கட்டுப்படுத்த முடியும். ஆனால், பெரும்பாலானோர் அறிகுறிகள் தீவிரமான பிறகே மருத்துவரை அணுகுகிறார்கள். இதில்தான் மருத்துவப் படப்பிடிப்பு (Imaging) மிக முக்கிய பங்கு வகிக்கிறது.

எளிய அல்ட்ராசவுண்ட் ஸ்கேன் மற்றும் அடிப்படை ரத்தப் பரிசோதனைகள் மூலமாக, கொழுப்புக் கல்லீரல், ஆரம்பகட்ட தழும்புகள் மற்றும் பிற கல்லீரல் மாற்றங்களை முன்கூட்டியே கண்டறிய முடியும். பலருக்கு உடலில் எந்த அறிகுறியும் தோன்றுவதற்கு முன்பே, ஸ்கேன் பரிசோதனையே நோயின் முதல் அறிகுறியை வெளிப்படுத்துகிறது.

ஆரம்பகட்ட கண்டறிதல் நோயாளிகளுக்கு மிகவும் விலைமதிப்பற்ற ஒரு வாய்ப்பை வழங்குகிறது. நேரம் வாழ்க்கை முறையை மாற்றவும், சிகிச்சையைத் தொடங்கவும், எதிர்கால சிக்கல்களைத் தடுக்கவும் அந்த நேரம் உதவுகிறது.

தடுப்பு நடவடிக்கையே சிறந்த பாதுகாப்பு

கதிரியக்க நிபுணராக நான் கற்றுக்கொண்ட மிகப்பெரிய பாடம், சிகிச்சையை விட தடுப்பதே மிகவும் எளிதானது என்பதுதான்.

கல்லீரலைப் பாதுகாக்க பெரிய சிகிச்சைகள் தேவையில்லை. ஆரோக்கியமான உடல் எடையைப் பராமரித்தல், தினசரி உடற்பயிற்சி, சத்தான உணவு, நீரிழிவு மற்றும் கொலஸ்ட்ராலை
கட்டுப்பாட்டில் வைத்தல், மதுபானத்தைத் தவிர்த்தல் அல்லது அளவோடு அருந்துதல், தேவையற்ற மருந்துகளை உட்கொள்ளாமல் இருப்பது ஆகியவை கல்லீரல் நோய் ஏற்படும் அபாயத்தை வெகுவாகக் குறைக்கின்றன.

அதேபோல், ஹெபடைட்டிஸ் பி தடுப்பூசியை கட்டாயம் செலுத்திக் கொள்ள வேண்டும். மருத்துவர் பரிந்துரைத்தால், ஹெபடைட்டிஸ் பி மற்றும் சி பரிசோதனைகளையும் செய்து கொள்ள வேண்டும். தொடர்ச்சியான சோர்வு, கண்கள் மஞ்சளாகுதல், வயிறு அல்லது கால் களில் வீக்கம், காரணமில்லாத உடல் எடை குறைதல், கல்லீரல் செயல்பாட்டு பரிசோதனையில் மாற்றங்கள் போன்ற அறிகுறிகளை ஒருபோதும் அலட்சியப் படுத்தக்கூடாது. அவை உடனடி மருத்துவக் கவனிப்புக்குரியவை.

ஒவ்வொரு நாளும் ஸ்கேன் அறையில் நான் உணர்வது ஒன்றுதான். மனித உடலில் மிகவும் உறுதியான உறுப்புகளில் கல்லீரலும் ஒன்று. கடுமையான அழுத்தத்திலும் அது நீண்ட காலம் அமைதியாக தனது பணியைச் செய்து கொண்டே இருக்கும். ஆனால், அந்த அமைதி என்றென்றும் நீடிக்காது.

30 வயதிலேயே சிரோசிஸ் என்பது இன்று அரிதான நோயறிதல் அல்ல. நாடு முழுவதும் மருத்துவர்கள் அதிகரித்து வரும் ஒரு கவலைக்குரிய உண்மையாக இதைக் காண்கிறார்கள்.ஆனால் நம்பிக்கை தரும் செய்தி என்னவென்றால், இந்த நோய்களில் பலவற்றைத் தடுக்க முடியும். விழிப்புணர்வு, ஆரோக்கியமான வாழ்க்கை முறை மற்றும் சரியான நேரத்தில் மேற்கொள்ளப்படும் பரிசோதனைகள் மூலம், இளம் தலைமுறையை நிரந்தர கல்லீரல் பாதிப்பிலிருந்து பாதுகாக்க முடியும்.

உலக ஹெபடைட்டிஸ் தினத்தை முன்னிட்டு நான் கூற விரும்பும் ஒரு எளிய செய்தி இதுதான்:

“அறிகுறிகள் வந்தபிறகு அல்ல, அதற்கு முன்பே உங்கள் கல்லீரலை பாதுகாக்க பாருங்கள். எதிர்காலத்தை மாற்றும் மிக முக்கியமான நோயறிதல், சரியான நேரத்தில் கண்டறியப்படுவதுதான்”

தொகுப்பு: கதிரியக்க நிபுணர் மருத்துவர் பிரசன்னா