டெல்லி: ‘இந்தியா’ (INDIA) கூட்டணி கூட்டத்திற்குப் பிறகு செய்தியாளர்களிடம் பேசிய காங்கிரஸ் தேசியத் தலைவர் மல்லிகார்ஜுன கார்கே, நாட்டு மக்கள் சந்திக்கும் பிரச்சனைகள் குறித்து பேசி விவாதித்தோம் என்றார். நாட்டில் தற்போது நிலவி வரும் ஆபத்தான பொருளாதாரச் சூழல், விவசாயிகளின் பிரச்சினைகள் மற்றும் மக்கள் சார்ந்த பிற விவகாரங்கள் குறித்து விவாதிக்க மத்திய அரசு உடனடியாக அனைத்துக் கட்சிக் கூட்டத்தைக் கூட்ட வேண்டும் என்று மல்லிகார்ஜுன கார்கே வலியுறுத்தி உள்ளார்.

இன்று நாங்கள் ஐந்து முக்கிய அம்சங்கள் குறித்து உடன்பாடு கண்டுள்ளோம்; அந்த விவகாரங்கள் தொடர்பாகத் தொடர்ந்து செயல்படுவோம். முதலாவதாக, முதல் தகவல் அறிக்கைகள் (FIR), வாக்குத் திருட்டு மற்றும் தேர்தல் முறைகேடுகள் ஆகியவை குறித்து இந்தியத் தலைமை நீதிபதிக்குக் கடிதம் அனுப்புவது என்று முடிவு செய்யப்பட்டுள்ளது என்று கூறினார்.

அடுத்து நீட் (NEET) மற்றும் சிபிஎஸ்இ (CBSE) தேர்வுகளை எழுதிய லட்சக்கணக்கான இளைஞர்களுக்கு இழைக்கப்பட்ட துரோகத்திற்குத் தலைமை தாங்கிய கல்வி அமைச்சர் உடனடியாகப் பதவி விலக வேண்டும் என்று ஒருமனதாக வலியுறுத்தப்பட்டது. மூன்றாவதாக, தற்போதைய ஆபத்தான பொருளாதாரச் சூழல், வேலையின்மை, விலைவாசி உயர்வு, விவசாயிகளின் பிரச்சினைகள் மற்றும் மக்கள் சார்ந்த பிற விவகாரங்கள் குறித்து விவாதிக்க மத்திய அரசு உடனடியாக அனைத்துக் கட்சிக் கூட்டத்தைக் கூட்ட வேண்டும். நாடாளுமன்றத்தின் மழைக்காலக் கூட்டத்தொடரின் போது எதிர்க்கட்சித் தலைவரின் அலுவலகத்தில் தினமும் காலை வேளையில் சந்திப்புகள் நடத்தப்பட்டு, நாடாளுமன்றச் செயல்பாடுகளில் ஒருங்கிணைப்புத் தொடர்ந்து மேற்கொள்ளப்படும் என்றார்.

இன்றைய கூட்டத்தில் சுமார் 25 கட்சிகள் பங்கேற்றதாக குறிப்பிட்டார். அதே போல உத்தவ் தாக்கரே மற்றும் ஹேமந்த் சோரன் ஆகியோரும் காணொளி வாயிலாக இக்கூட்டத்தில் இணைந்து தங்கள் கருத்துகளைப் பகிர்ந்து கொண்டனர் என்றார். மேலும் இனி 2 மாதங்களுக்கு ஒருமுறை INDIA கூட்டணியின் கூட்டம் நடைபெறும். அந்த வகையில் வரும் அடுத்த கூட்டம் வரும் ஆகஸ்ட் மாதம் 8-ஆம் தேதி ஐதராபாத்தில் நடைபெறும் என கூறினார்.

இதனிடையே இந்த கூட்டத்திற்குப் பிறகு செய்தியாளர்களிடம் பேசிய ஆர்ஜேடி (RJD) தலைவரும் பீகார் சட்டப்பேரவை எதிர்க்கட்சித் தலைவருமான தேஜஸ்வி யாதவ் , 5 முக்கிய விவகாரங்கள் குறித்து ஒருமித்த கருத்து எட்டப்பட்டுள்ளது; அவற்றை முன்வைப்பதில் நாங்கள் அனைவரும் ஒன்றிணைந்துள்ளோம்… வாக்குச்சீட்டுகளைப் பயன்படுத்தித் தேர்தல் நடத்தப்பட்டால், பாஜக-வால் வெற்றிபெறவே முடியாது என்று கூறினார்.