புதுடெல்லி: காங்கிரஸ் கட்சியின் ஆதிக்க மனப்பான்மையால் இந்தியா கூட்டணி தற்போது சிதைந்து வரும் நிலையில், மாநில கட்சிகள் கடும் அதிருப்தி அடைந்துள்ளன. கடந்த 2023ம் ஆண்டு பாஜவிற்கு எதிராக 28க்கும் மேற்பட்ட எதிர்க்கட்சிகள் ஒன்றிணைந்து ‘இந்தியா’ கூட்டணியை உருவாக்கின. வலுவான ஒரு அணியாகப் பார்க்கப்பட்ட இந்த கூட்டணி, தற்போது காங்கிரஸ் கட்சியின் ‘பெரிய அண்ணன்’ மனப்பான்மை மற்றும் மாநில கட்சிகளை அரவணைக்கத் தவறியதால் வலுவிழந்து காணப்படுகிறது. மாநில அளவில் நிலவும் உள்ளூர் அரசியல் நலன்களுக்கும், காங்கிரசின் தேசிய அளவிலான ஆசைகளுக்கும் இடையே ஏற்பட்ட மோதல்கள் கூட்டணியைச் சிதைத்துள்ளன.

கூட்டணியின் முக்கிய சிற்பியாகக் கருதப்பட்ட நிதிஷ் குமார் மற்றும் அவரது ஐக்கிய ஜனதா தளம் வெளியேறியது முதல் அடியாக விழுந்தது. 2024ம் ஆண்டுக்கு முன்னதாகவே அவர் தேசிய ஜனநாயகக் கூட்டணியில் இணைந்தார். தொகுதிப் பங்கீட்டில் ஏற்பட்ட காலதாமதம் மற்றும் ஒருங்கிணைப்பாளரை நியமிக்க காங்கிரஸ் மறுத்ததே இதற்குக் காரணம். ராகுல் காந்தியின் யாத்திரையில் மட்டுமே காங்கிரஸ் கவனம் செலுத்தியதால், பீகார் போன்ற இந்தி பேசும் மாநிலங்களில் கூட்டணியின் வேகம் முற்றிலும் அடங்கியது.

மேற்கு வங்கத்தில் திரிணாமுல் காங்கிரஸ் மற்றும் காங்கிரஸ் இடையிலான உறவு முற்றிலும் முறிந்துவிட்டது. மம்தா பானர்ஜி அங்குள்ள 42 மக்களவை தொகுதிகளிலும் தனித்துப் போட்டியிட முடிவு செய்தார். செல்வாக்கு இழந்த நிலையிலும் காங்கிரஸ் கட்சி கூடுதல் இடங்களைக் கேட்டது மம்தாவை அதிருப்தி அடையச் செய்தது. இதனால், அரசியல் ரீதியாக முக்கியத்துவம் வாய்ந்த ஒரு மாநிலத்தில் ‘இந்தியா’ கூட்டணி என்பது பெயரளவில் கூட இல்லாமல் போனது.

பஞ்சாப் மற்றும் டெல்லியில் ஆம் ஆத்மி கட்சியுடன் காங்கிரஸ் கொண்ட உறவு பெரும் சவால்களைச் சந்தித்தது. டெல்லியில் ஒரு வழியாகத் தொகுதிப் பங்கீடு நடந்தாலும், பஞ்சாப்பில் இரு கட்சிகளும் ஒருவரையொருவர் எதிர்த்துப் போரிட்டன. மாநில காங்கிரஸ் தலைவர்கள் இந்தக் கூட்டணியைத் தற்கொலைக்குச் சமம் என்று கூறி தலைமையைத் தூற்றினர். இது வாக்காளர்கள் மத்தியில் பெரும் குழப்பத்தை ஏற்படுத்தியதுடன், காங்கிரசால் தன்னுடைய கூட்டாளிகளை வழிநடத்த முடியாது என்பதை நிரூபித்தது. உத்தரப் பிரதேசத்தில் அகிலேஷ் யாதவின் சமாஜ்வாடி கட்சியும் காங்கிரசுக்குச் சரியான பாடம் புகட்டியது. மத்தியப் பிரதேச தேர்தலின் போது காங்கிரஸ் காட்டிய பிடிவாதத்திற்குப் பதிலடியாக, உத்தரப் பிரதேசத்தில் காங்கிரசுக்குச் சில இடங்களை மட்டுமே அவர் ஒதுக்கினார். பாஜகவுக்குச் சவாலாக இல்லாத மாநிலங்களில் கூட காங்கிரஸ் அதிக இடங்களைக் கேட்பது மாநில கட்சி தலைவர்களிடையே எரிச்சலை ஏற்படுத்தி வருகிறது.

இன்றைய நிலவரப்படி இந்தக் கூட்டணியில் காங்கிரஸ், திமுக, சரத் பவாரின் தேசியவாத காங்கிரஸ், உத்தவ் தாக்கரேவின் சிவசேனா (யுபிடி), ராஷ்டிரிய ஜனதா தளம், ஜார்க்கண்ட் முக்தி மோர்ச்சா மற்றும் இடதுசாரி கட்சிகள் மட்டுமே எஞ்சியுள்ளன. ஆனால், ஜெயந்த் சவுதரியின் ஆர்.எல்.டி மற்றும் நிதிஷ் குமாரின் ஜே.டி.யு போன்றவை ஏற்கனவே பாஜக பக்கம் சாய்ந்துவிட்டன. எஞ்சியுள்ள கட்சிகளுக்கிடையே உள்ள பிணைப்பும் வெறும் தற்காலிகமானதாகவே பார்க்கப்படுகிறது.

தற்போது கூட்டணியில் இருக்கும் ராஷ்டிரிய ஜனதா தளம் போன்ற கட்சிகள், காங்கிரசின் தேசிய தலைமை மீது நம்பிக்கை கொண்டு அங்கில்லை. மாறாக, தங்கள் சொந்த மாநிலங்களில் உள்ள அரசியல் சூழல் மற்றும் பாஜகவை எதிர்க்க வேண்டிய கட்டாயம் காரணமாகவே கூட்டணியில் ஒட்டிக்கொண்டுள்ளன. காங்கிரஸ் ஒரு ஒருங்கிணைப்பாளராகச் செயல்படாமல் ஆதிக்கம் செலுத்த முயல்வது இக்கட்சிகளுக்கும் மனக்கசப்பை ஏற்படுத்தியுள்ளது.

ஒட்டுமொத்தமாகப் பார்க்கையில், இந்தியா கூட்டணி தோல்வியடைந்த கூட்டணியாகவே கருதப்படுகிறது. ஒரு ஒருங்கிணைந்த கூட்டாளியாக மாறுவதை விட, தனது சொந்த அரசியல் இருப்பைத் தக்கவைப்பதற்கே காங்கிரஸ் முன்னுரிமை அளித்தது. இதனால், பாஜகவை எதிர்த்துப் போராடுவதை விடத் தங்களுக்குள் மோதிக்கொள்வதிலேயே எதிர்க்கட்சிகள் அதிக சக்தியை விரயம் செய்கின்றன. காங்கிரஸ் தனது வியூகத்தை மாற்றிக்கொள்ளாவிட்டால், இந்தக் கூட்டணி வெறும் காகித அளவிலேயே நின்றுவிடும். தமிழ்நாட்டில் கூட தனது அரசியல் ஆதாயத்திற்காக பேரவை தேர்தலுக்கு பின்னர் விஜய்யின் தவெக உடன் காங்கிரஸ் கைக்கோர்த்தது. காங்கிரசின் இந்த நிலைபாடு கடும் விமர்சனத்திற்கு ஆளாகி உள்ளது. ‘இந்தியா’ கூட்டணி உருவான போது இருந்த பல கட்சிகளில், பல கட்சிகள் அந்த கூட்டணியில் இருந்து வெளியேறிவிட்டன. இதனால் கிடைக்கும் ஆட்சி அதிகார பலனை பாஜக அனுபவித்து வருகிறது. இறுதியாக பொறுப்புள்ள எதிர்கட்சியாக, கூட்டணி கட்சிகளை ஒருங்கிணைத்து செல்ல வேண்டிய காங்கிரஸ், தன்னுடைய ஆதிக்க மனப்பான்மையால் பல இழப்புகளை சந்திப்பது மட்டுமின்றி, பாஜகவுக்காக வேலை செய்வதாகவும் அரசியல் பார்வையாளர்கள் கடுமையாக விமர்சித்து வருகின்றனர்.

எந்தெந்த கட்சி கூட்டணியில் உள்ளது?
பாஜக தலைமையிலான தேசிய ஜனநாயகக் கூட்டணிக்கு (என்டிஏ) மாற்றாக, காங்கிரஸ் உள்ளிட்ட எதிர்க்கட்சிகளால் உருவாக்கப்பட்ட ‘இந்தியா’ கூட்டணி 2023ம் ஆண்டு ஜூலை 18ம் தேதி உருவானது. தொடக்கத்தில் 28 கட்சிகள் இக்கூட்டணியில் இருந்தன. இன்றைய நிலவரப்படி பல கட்சிகள் வெளியேறியும் அல்லது காங்கிரஸ் உடன் மோதல் போக்கைக் கடைப்பிடித்தும் வருகின்றன. தற்போது கூட்டணியில் பெயரளவில் நீடிக்கும் அல்லது ஆதரவாக உள்ள முக்கிய கட்சிகளில் காங்கிரஸ் (தலைமை), சமாஜ்வாடி கட்சி (உத்தரப் பிரதேசம்). இடதுசாரிக் கட்சிகள் (இ.கம்யூ, மா.கம்யூ.), ராஷ்டிரிய ஜனதா தளம் (பீகார்) மற்றும் சிறு கட்சிகள் உள்ளன. வெளியேறிய மற்றும் எதிர்ப்பு தெரிவிக்கும் கட்சிகள் பட்டியலில், திரிணாமுல் காங்கிரஸ் (மம்தா பானர்ஜி), ஆம் ஆத்மி கட்சி (கெஜ்ரிவால்), ஐக்கிய ஜனதா தளம் (நிதிஷ்குமார்) கட்சிகள் உள்ளன. தமிழக சட்டமன்றத் தேர்தலுக்குப் பிறகு, காங்கிரஸ் கட்சி விஜய் தலைமையிலான தவெக பக்கம் ஆதரவு நிலையை எடுத்ததால், திமுக தலைமை காங்கிரசின் மீது கடும் அதிருப்தியில் உள்ளது. சுருக்கமாகச் சொன்னால், 2023ல் பெரும் எதிர்பார்ப்புடன் தொடங்கப்பட்ட இந்த ‘இந்தியா’ கூட்டணி, 2026ம் ஆண்டில் காங்கிரசின் மேலாதிக்கப் போக்கு மற்றும் மாநிலக் கட்சிகளின் அதிகாரப் போட்டியால் சிதறுண்ட நிலையில்
உள்ளது.