புதுச்சேரி ஒரு யூனியன் பிரதேசம். முந்தைய பிரெஞ்சு குடியேற்றங்களான பாண்டிச்சேரி, காரைக்கால், மாஹே மற்றும் ஏனாம் ஆகிய 4 பகுதிகளிலிருந்து உருவாக்கப்பட்டது. பாண்டிச்சேரி சென்னைக்கு தெற்கே 160 கி.மீ தொலைவில் அமைந்துள்ளது மற்றும் தமிழ்நாட்டின் கடலூர் மற்றும் விழுப்புரம் மாவட்டங்களால் சூழப்பட்டுள்ளது. காரைக்கால், பாண்டிச்சேரிக்கு தெற்கே சுமார் 150 கிமீ தொலைவில் அமைந்துள்ளது மற்றும் தமிழ்நாட்டின் நாகப்பட்டினம் மாவட்டத்திற்குள் அமைந்துள்ளது.

மாஹே பகுதி கேரள கடற்கரையில் அமைந்துள்ளது. கேரளாவின் கோழிக்கோடு மற்றும் கண்ணூர் மாவட்டங்களின் எல்லையில் அமைந்துள்ளது. ஏனாம் கோரிங்கா கோதாவரி ஆற்றின் கரையில் உள்ளது மற்றும் ஆந்திராவின் கிழக்கு கோதாவரி மாவட்டத்தில் அமைந்துள்ளது. புதுச்சேரி யூனியன் பிரதேசம் ெமாத்தம் 480 சதுர கி.மீ பரப்பளவைக் கொண்டுள்ளது,

இதில் புதுச்சேரி பகுதி மட்டும் 290 சதுர கி.மீ., காரைக்கால் 161 சதுர கி.மீ., மாஹே 9 சதுர கி.மீ. மற்றும் ஏனாம் 20 சதுர கி.மீ. பரப்பளவைக் கொண்டுள்ளது. 2026 எஸ்ஐஆர் திருத்தப் பட்டியலின்படி புதுச்சேரியின் தற்போதைய மொத்த வாக்காளர்கள் 9,18,111. இதில் 4,31,301 ஆண்கள் மற்றும் 4,86,673 பெண்கள், 137 பேர் மூன்றாம் பாலினத்தவர். காரைக்கால் பகுதி புதுச்சேரியிலிருந்து 150 கி.மீ தொலைவில் உள்ளது. ஏனாம் புதுச்சேரியிலிருந்து வடகிழக்கில் சுமார் 840 கி.மீ தொலைவில் உள்ளது மற்றும் மாஹே புதுச்சேரிக்கு மேற்கே 653 கி.மீ தொலைவில் உள்ளது.

பாண்டிச்சேரி மற்றும் காரைக்காலில் தமிழ் பேசப்படுகிறது. மாஹேயில் மலையாளம் மற்றும் ஏனாமில் தெலுங்கு பேசப்படுகிறது. பிரெஞ்சு மொழி பேசும் மக்களும் பலர் உள்ளனர்.  தமிழ், தெலுங்கு, மலையாளம், ஆங்கிலம் மற்றும் பிரெஞ்சு ஆகியவை பாண்டிச்சேரி யூனியன் பிரதேசத்தின் அதிகாரப்பூர்வ மொழிகளாகும். யூனியன் பிரதேச அரசு சட்டத்தின்படி, முழு புதுச்சேரியும் ஒரு ஒற்றை நாடாளுமன்றத் தொகுதியில் (லோக் சபா) உள்ளடக்கியது.

புதுச்சேரி மாநிலங்களவையிலும் ஒரு இடத்தை பெற்றுள்ளது. 30 (புதுச்சேரி-23, காரைக்கால்- 5, மாஹே மற்றும் ஏனாம் தலா- 1) தேர்ந்தெடுக்கப்பட்ட உறுப்பினர்கள் மற்றும் 3 நியமன உறுப்பினர்களை கொண்ட யூனியன் பிரதேசத்திற்கு ஒரு சட்டப்பேரவை உள்ளது. ஒரே நாடாளுமன்றத் தொகுதிக்கான முதல் தேர்தல் 1963 ஆம் ஆண்டு சட்டப்பூர்வ இணைப்பிற்குப் பிறகு நடைபெற்றது. 1964ல் முதன்முதலில் சட்டப்பேரவை தேர்தல் நடைபெற்றது.

இந்திய வம்சாவளியைச் சேர்ந்த ஆயிரக்கணக்கான பிரெஞ்சு குடிமக்கள் புதுச்சேரி யூனியன் பிரதேசத்திற்குள் இன்றும் வசிப்பதால் பிரெஞ்சு நாடாளுமன்றத் தேர்தலின்போது அவர்கள் தொடர்ந்து தங்கள் வாக்குரிமையை பயன்படுத்துகிறார்கள். இதற்காக பிரெஞ்சு அரசாங்கம் பாண்டிச்சேரிக்குள் தனது குடிமக்களின் நலனுக்காக வாக்குச் சாவடிகளை அமைத்து வருவது குறிப்பிடத்தக்கது.