வாஷிங்டன்: இந்தியா மீதான பரஸ்பர வரியை 25%லிருந்து 18%ஆகக் குறைப்பதாக அமெரிக்க அதிபர் ட்ரம்ப் அறிவித்துள்ளார். பிரதமர் மோடி உடன் பேச்சுவார்த்தை நடத்தி, இந்தியா – அமெரிக்கா இடையே வர்த்தகம் ஒப்பந்தம் இறுதி செய்யப்பட்டதாகவும் தெரிவித்துள்ளார்.

அமெரிக்க அதிபர் ட்ரம்ப் தனது சமூக வலைதள பதிவில் கூறியதாவது;
இந்தியாவின் பிரதமர் மோடியுடன் உரையாடியது எனக்கு ஒரு பெருமையாக இருந்தது. அவர் எனது சிறந்த நண்பர்களில் ஒருவர், மேலும் தனது நாட்டின் சக்திவாய்ந்த மற்றும் மதிக்கப்படும் தலைவர். வர்த்தகம் மற்றும் ரஷ்யா-உக்ரைன் போரை முடிவுக்குக் கொண்டுவருவது உட்பட பல விஷயங்களைப் பற்றி நாங்கள் பேசினோம். ரஷ்ய எண்ணெயை வாங்குவதை நிறுத்திவிட்டு, அமெரிக்கா மற்றும் சாத்தியமானால் வெனிசுலாவிலிருந்து அதிக அளவில் வாங்குவதற்கு அவர் ஒப்புக்கொண்டார்.

ஒவ்வொரு வாரமும் ஆயிரக்கணக்கான மக்கள் இறந்துகொண்டிருக்கும், தற்போது நடந்துகொண்டிருக்கும் உக்ரைன் போரை முடிவுக்குக் கொண்டுவர இது உதவும்! பிரதமர் மோடி மீதான நட்பு மற்றும் மரியாதை காரணமாகவும், அவரது கோரிக்கையின்படியும், உடனடியாக அமலுக்கு வரும் வகையில், அமெரிக்காவிற்கும் இந்தியாவிற்கும் இடையே ஒரு வர்த்தக ஒப்பந்தத்திற்கு நாங்கள் ஒப்புக்கொண்டோம். இதன் மூலம் அமெரிக்கா பரஸ்பர வரியைக் குறைத்து, 25 சதவீதத்திலிருந்து 18 சதவீதமாகக் குறைக்கும்.

அதேபோல், அவர்களும் அமெரிக்காவிற்கு எதிரான தங்கள் வரிகள் மற்றும் வரியல்லாத தடைகளை நீக்கும் நடவடிக்கைகளை எடுப்பார்கள். 500 பில்லியன் டாலருக்கும் அதிகமான அமெரிக்க எரிசக்தி, தொழில்நுட்பம், விவசாயம், நிலக்கரி மற்றும் பல அமெரிக்கப் பொருட்களை வாங்குவதாக பிரதமர் மோடி உறுதியளித்தார். இந்தியாவுடனான நமது அற்புதமான உறவு இனி வரும் காலங்களில் இன்னும் வலுப்பெறும் என கூறியுள்ளார்.