தமிழ்நாடு, கேரளா, கர்நாடகாவில் ஆளுநர்களை கைப்பாவைகளாக மோடி அரசு பயன்படுத்துகிறது: கார்கே கடும் குற்றச்சாட்டு

ஹுப்பள்ளி: தமிழ்நாடு, கேரளா, கர்நாடகா மாநில அரசுகளைத் துன்புறுத்துவதற்காக மோடி அரசு ஆளுநர்களை கைப்பாவைகளாக பயன்படுத்துகிறது என்று கார்கே குற்றம் சாட்டினார். கர்நடாக மாநிலம் ஹூப்பள்ளியில் நடந்த விழாவில் பங்கேற்ற காங்கிரஸ் தலைவர் கார்கே கூறியதாவது: வரவிருக்கும் அனைத்துத் தேர்தல்களிலும் பாஜவுக்கு எதிராக மக்கள் வாக்களிக்க வேண்டும். அவ்வாறு செய்யத் தவறினால் சர்வாதிகார ஆட்சிக்கு வழிவகுக்கும். காங்கிரஸ் அரசுகள் சரியான சட்டங்களை இயற்றின.

ஆனால் மோடி அரசு மக்களின் உரிமைகளைக் குறைக்கும் சட்டங்களைக் கொண்டு வருகிறது. பிரதமர் அலுவலகம் மற்றும் ஒன்றிய உள்துறை அமைச்சகம் ஆளுநர்களுக்கு உத்தரவுகளை பிறப்பித்து வருகிறது. ஒன்றிய அரசு, பிரதமர் அலுவலகம், உள்துறை அமைச்சர் அலுவலகம் மூலம், சித்தராமையா அல்லது காங்கிரஸ் அரசு தயாரித்த உரைகளைப் படிக்க வேண்டாம் என்று ஆளுநருக்கு நேரடியாக அறிவுறுத்துகிறது. இந்த பிரச்னை கர்நாடகாவில் மட்டுமல்ல, தமிழ்நாடு, கேரளாவிலும் இதேதான் நடந்தது.

காங்கிரஸ் அல்லது பாஜ அல்லாத அரசுகள் ஆட்சியில் இருக்கும் இடங்களிலெல்லாம், ஆளுநர்கள் பிரச்சனையை உருவாக்குகிறார்கள். ஆளுநர்கள் மேலிடத்தில் இருந்து உத்தரவுகளைப் பெற்றதாக தனிப்பட்ட முறையில் ஒப்புக்கொள்கிறார்கள். இதைப்பார்க்கும் போது மோடி அரசு ஆளுநர்களை தங்கள் கைகளில் பொம்மைகளாக ஆக்கிவிட்டனர். எந்தவொரு நல்ல பணிக்கோ அல்லது மசோதாக்களுக்கோ ஆளுநர்கள் ஒப்புதல் அடையாளத்தைக் கொடுத்து திருப்பி அனுப்புவதில்லை.

இதைப்பார்க்கும் போது மோடி அரசாங்கம் பல விஷயங்களை தவறான பாதையில் கொண்டு செல்வது தெரிகிறது. மோடி அரசு நாட்டிற்கு என்ன செய்துள்ளது?. காங்கிரஸ், நேரு, இந்திரா காந்தி, சோனியா காந்தி மற்றும் ராகுல் காந்தியை விமர்சிப்பதைத் தவிர பாஜக வேறு எதையும் செய்யவில்லை. 100 நாள் வேலை திட்டத்தை ரத்து செய்வதன் மூலம், அவர்கள் விபி ஜி ராம் ஜி திட்டத்தை கொண்டு வந்துள்ளனர்.

அரசியலமைப்பின் 41வது பிரிவு, வழிகாட்டுதல் கொள்கைகளின்படி 100 நாள் திட்டத்தின் கீழ் மக்களுக்கு வேலை செய்யும் உரிமை வழங்கப்பட்டது, ஆனால் மோடி அரசு அதை பறித்துவிட்டது. இது தொடர அனுமதிக்க மாட்டோம். நாங்கள் போராடுவோம், மேலும் கடந்த காலத்தில் அரசாங்கத்தால் மூன்று விவசாயச் சட்டங்கள் திரும்பப் பெறப்பட்ட விதத்தைப் போலவே, விபி ஜி ராம் ஜி சட்டமும் திரும்பப் பெறப்பட்டு, ஏழைகளின் நலனுக்காக 100 நாள் வேலை திட்ட சட்டம் மீண்டும் நிறுவப்படுவதை உறுதி செய்வோம்.

இந்த போராட்டத்திற்கு நீங்கள் அனைவரும் தயாராக இருக்க வேண்டும்.நாங்கள் போராடவில்லை என்றால், அவர்கள் மக்களுக்கும் ஏழைகளுக்கும் ஆதரவான உணவு தானியங்கள், வீட்டுவசதி, குழந்தைகளுக்கு இலவச மற்றும் கட்டாயக் கல்வி வழங்கும் திட்டங்களையும் கூட அகற்றுவார்கள. இவ்வாறு பேசினார்.

* அனைத்து தேர்தல்களிலும் பா.ஜவுக்கு தோல்வியை கொடுக்க வேண்டும்
கார்கே பேசும் போது,’எந்த அரசியல் கட்சியும் நிரந்தரமாக ஆட்சியில் இல்லை. ஆனால் நாடு நிரந்தரமானது. பாஜவும் தேசம் முதலில் என்று கூறுகிறது, ஆனால் தேர்தல்களின் போது மட்டுமே, ஆர்எஸ்எஸ் மற்றும் பாஜவுக்கு நாடு, அரசியலமைப்பு, ஜனநாயகம் எல்லாம் நினைவுக்கு வரும்.

வரவிருக்கும் அனைத்து தேர்தல்களிலும், சிறியதாக இருந்தாலும் சரி, பெரியதாக இருந்தாலும் சரி, பாஜவை அதிகாரத்திலிருந்து வெளியேற்ற வேண்டும். அப்போதுதான், ஏழைகள், நடுத்தர வர்க்கத்தினர், சிறிய தொழில்களில் இருப்பவர்கள் உயிர்வாழ முடியும். இல்லையென்றால், ஹிட்லர், முசோலினி, சதாம் உசேன் போன்ற சர்வாதிகார ஆட்சி இந்த நாட்டில் வரும்’ என்றார்.