மதுரை: குடியரசு தினத்தை முன்னிட்டு சென்னையில் இருந்து கன்னியாகுமரிக்கு இன்று சிறப்பு ரயில் இயக்கப்படுகிறது. இது குறித்து தெற்கு ரயில்வே வெளியிட்டுள்ள அறிக்கை: குடியரசு தினத்தையொட்டி இன்று (ஜன.23ம் தேதி) இரவு 11.45 மணிக்கு சென்னை எழும்பூரில் இருந்து புறப்படும் சிறப்பு ரயில், நாளை மதியம் 1 மணிக்கு கன்னியாகுமரி சென்றடையும். மறு மார்க்கத்தில் அங்கிருந்து ஜன.26ம் தேதி இரவு 9.55 மணிக்கு புறப்படும் சிறப்பு ரயில், மறுநாள் காலை 10.15 மணிக்கு சென்னை பீச் சென்றடையும்.
இந்த ரயில் செங்கல்பட்டு, விழுப்புரம், விருத்தாச்சலம், அரியலூர், ரங்கம், திருச்சி, திண்டுக்கல், மதுரை, விருதுநகர், சாத்தூர், கோவில்பட்டி, திருநெல்வேலி, நாங்குநேரி, வள்ளியூர், நாகர்கோவில் வழியாகச் செல்லும். இதில், 18 ஏ.சி., மூன்றடுக்கு படுக்கை வசதி, 2 மாற்றுத் திறனாளிகளுக்கான பெட்டிகள் இணைக்கப்பட்டுள்ளன என அறிக்கையில் தெரிவிக்கப்பட்டுள்ளது.
