பிரிஸ்பேன்: இங்கிலாந்து அணிக்கு எதிரான ஆஷஸ் தொடரின் 2வது டெஸ்ட் போட்டியில் ஆஸ்திரேலியா அணி, 8 விக்கெட் வித்தியாசத்தில் அட்டகாசமான வெற்றியை பதிவு செய்துள்ளது. இங்கிலாந்து கிரிக்கெட் அணி, ஆஸ்திரேலியாவுக்கு சுற்றுப்பயணம் செய்து 5 டெஸ்ட் போட்டிகள் கொண்ட தொடரில் ஆடி வருகிறது. ஏற்கனவே முடிந்த முதல் டெஸ்ட் போட்டியில் ஆஸி அபார வெற்றி பெற்ற நிலையில், பிரிஸ்பேன் நகரில், கடந்த 4ம் தேதி 2வது டெஸ்ட் போட்டி துவங்கியது.
முதல் இன்னிங்சில் இங்கிலாந்து அணி, 334 ரன்கள் எடுத்தது. அதற்கு பதிலடியாக, ஆஸ்திரேலியா அணி, 511 ரன்கள் குவித்து ஆட்டமிழந்தது. அதனால், 177 ரன்கள் பின் தங்கிய நிலையில் இங்கிலாந்து அணி 2வது இன்னிங்சை துவக்கியது. 3ம் நாள் ஆட்டத்தில் இங்கிலாந்து வீரர்கள் சொதப்பலாக ஆடி சீரான இடைவெளியில் விக்கெட்டுகளை பறிகொடுத்ததால் ஆட்ட நேர முடிவில் அந்த அணி 6 விக்கெட் இழப்புக்கு 134 ரன் எடுத்திருந்தது.
இந்நிலையில் நேற்று 4ம் நாளில் 2வது இன்னிங்சை இங்கிலாந்து தொடர்ந்தது. களத்தில் இருந்த வில் ஜாக்ஸ் 41 ரன்னிலும், கேப்டன் பென் ஸ்டோக்ஸ் 50 ரன்னிலும் விக்கெட்டுகளை பறிகொடுத்தனர். பின் வந்த கஸ் அட்கின்சன் 3, பிரைடன் கார்ஸ் 7 ரன்னில் அவுட்டானதால், 241 ரன்னுடன் இங்கிலாந்தின் ஆட்டம் முடிவுக்கு வந்தது. ஆஸி தரப்பில், மைக்கேல் நெஸர் 5, மிட்செல் ஸ்டார்க், ஸ்காட் போலண்ட் தலா 2 விக்கெட் சாய்த்தனர்.
அதையடுத்து, 65 ரன் இலக்குடன் ஆஸ்திரேலியா 2வது இன்னிங்சை துவக்கியது. துவக்க வீரர் டிராவிஸ் ஹெட் 22, பின் வந்த மார்னஸ் லபுஷனே 3 ரன்னில் வீழ்ந்தனர். இருப்பினும், மற்றொரு துவக்க வீரர் ஜேக் வெதரால்ட் 17, கேப்டன் ஸ்டீவன் ஸ்மித் 23 ரன் எடுத்தனர். அதனால், 10 ஓவரில் ஆஸ்திரேலியா 2 விக்கெட் இழப்புக்கு 69 ரன் எடுத்து, 8 விக்கெட் வித்தியாசத்தில் மகத்தான வெற்றியை பதிவு செய்தது. இதன் மூலம், ஆஷஸ் தொடரில் ஆஸி 2-0 என்ற கணக்கில் முன்னிலை வகிக்கிறது.
