கடலூர், நவ. 29:கடலூர் அருகே வீட்டில் தனியாக இருந்த 6 வயது சிறுமியை பாலியல் பலாத்காரம் செய்த முதியவருக்கு 20 ஆண்டுகள் சிறை தண்டனை விதித்து கடலூர் போக்சோ நீதிமன்றத்தில் தீர்ப்பு வழங்கப்பட்டது. கடலூர் மாவட்டம் சிதம்பரம் அருகே உள்ள வரகூர்பேட்டையை சேர்ந்தவர் ரவி (60), கூலி தொழிலாளி. இவர் கடந்த 2019ம் ஆண்டு அதே பகுதியை சேர்ந்த 6 வயது சிறுமி வீட்டில் தனியாக இருந்தபோது, அங்கு சென்று, அந்த சிறுமியை பாலியல் பலாத்காரம் செய்துள்ளார். இதுகுறித்து அந்த சிறுமி தனது பெற்றோரிடம் கூறியுள்ளார்.
இதனால் அதிர்ச்சி அடைந்த சிறுமியின் பெற்றோர் சிதம்பரம் அனைத்து மகளிர் காவல் நிலையத்தில் புகார் செய்தனர். புகாரின் பேரில் போலீசார் போக்சோ சட்டத்தின் கீழ் வழக்கு பதிவு செய்து ரவியை கைது செய்தனர். மேலும் அவர் மீது கடலூர் போக்சோ வழக்குகளை விசாரிக்கும் சிறப்பு நீதிமன்றத்தில் வழக்கு தொடர்ந்தனர். சாட்சிகள் விசாரணை நடந்து வந்த நிலையில், நேற்று இந்த வழக்கில் நீதிபதி லட்சுமி ரமேஷ் தீர்ப்பு கூறினார். அவர் தனது தீர்ப்பில், ரவி மீதான குற்றம் நிரூபிக்கப்பட்டதால் அவருக்கு 20 ஆண்டுகள் சிறை தண்டனையும் ₹50,000 அபராதமும் விதித்தார். இந்த வழக்கில் அரசு தரப்பில் வழக்கறிஞர் ஜோதிரத்தினம் ஆஜராகி வாதாடினார்.
The post கடலூர் அருகே வீட்டில் தனியாக இருந்த 6 வயது சிறுமியை சீரழித்த முதியவருக்கு 20 ஆண்டுகள் சிறை appeared first on Dinakaran.
