2014 முதல் மோடி அரசு தனது முடிவுகளை மாற்றிக்கொண்ட அல்லது பின்வாங்கிய நிகழ்வுகளின் பட்டியலில் தர்மேந்திர பிரதானின் விலகலும் இணைந்துள்ளது. அதன் விவரம்:
* மோடி அரசின் முதல் முக்கியப் பின்வாங்கல் 2015-ல் நிகழ்ந்தது. அப்போது உள்கட்டமைப்பு மற்றும் தொழில்துறை திட்டங்களுக்காக நிலத்தை கையகப்படுத்துவதை எளிதாக்கும் வகையில் நிலம் கையகப்படுத்தும் சட்டத்தில் திருத்தம் செய்ய அரசு முயன்றது. இந்த நடவடிக்கை விவசாய அமைப்புகள், எதிர்க்கட்சிகள் மற்றும் பல தேசிய ஜனநாயகக் கூட்டணி கூட்டணிக் கட்சிகளிடமிருந்து பரவலான எதிர்ப்பைத் தூண்டியது. இறுதியில், அந்த முன்மொழிவை மோடி அரசு கைவிட்டது.
* 2018 அக்டோபரில் மீ டூ இயக்கத்தின் போது பத்திரிகை ஆசிரியராகப் பணியாற்றிய காலத்தில் பாலியல் துன்புறுத்தலில் ஈடுபட்டதாகப் பல பெண்கள் குற்றம் சாட்டியதைத் தொடர்ந்து, அப்போதைய வெளியுறவுத்துறை இணையமைச்சர் எம்.ஜே. அக்பர் பதவி விலகினார்.
* 2021 நவம்பர் மாதம் மூன்று வேளாண் சட்டங்களை ரத்து செய்வதாக மோடி அறிவித்ததே அரசின் மிகப்பெரிய கொள்கை மாற்றமாகும். இச்சட்டங்கள் ஓராண்டு கால போராட்டத்தைத் தூண்டின. ஆயிரக்கணக்கான விவசாயிகள் அவற்றை திரும்பப் பெறக் கோரி டெல்லி எல்லைகளில் முகாமிட்டனர். சீர்திருத்தங்களை அரசு தொடர்ந்து நியாயப்படுத்திய போதிலும், இறுதியில் நாடாளுமன்றம் ரத்துச் சட்டத்தை நிறைவேற்றியதன் மூலம் அரசு பணிந்தது.
* 2024 ஆகஸ்ட் மாதம் இடஒதுக்கீடு விதிகள் இல்லாதது குறித்து எதிர்க்கட்சிகள் மற்றும் என்டிஏ கூட்டணிக் கட்சியான லோக் ஜனசக்தி கட்சி (ராம் விலாஸ்) ஆகியவை எதிர்ப்பு தெரிவித்ததைத் தொடர்ந்து, மூத்த குடிமைப் பணிகளுக்கான நேரடி நியமனம் தொடர்பான யுபிஎஸ்சி விளம்பரத்தை ஒன்றிய அரசு திரும்பப் பெற்றது.
* 2025 நவம்பர் மாதம் அரசியலமைப்பு (131-வது திருத்த) மசோதாவை அறிமுகப்படுத்துவதற்கு எதிராக வலுவான அரசியல் எதிர்ப்பு எழுந்ததையடுத்து அரசு அத்திட்டத்தைக் கைவிட்டது. குறிப்பாக பஞ்சாப் மாநிலக் கட்சிகள், இம்முன்மொழிவு மாநிலத்தின் அரசியல் பிரதிநிதித்துவத்தை நீர்த்துப்போகச் செய்யும் என்று வாதிட்டன.
* நீட் தேர்வு வினாத்தாள் கசிவு மற்றும் அதைத் தொடர்ந்து நிகழ்ந்த பல தற்கொலைகள் தொடர்பாக வாரக்கணக்கில் நடைபெற்ற போராட்டங்களுக்குப் பிறகு கல்வி அமைச்சர் தர்மேந்திரபிரதான் ராஜினாமா செய்துள்ளார்.
