40 வயதுக்கு மேற்பட்ட பெண்கள் ஆரோக்கியமாக முதுமையை சந்திப்பதற்கான முக்கிய காரணிகளில் ஒன்று சரியான ஊட்டச்சத்து. பெண்களுக்கு வயதாகும்போது, அவர்களின் உடலுக்கு குறைவான கலோரிகளே தேவைப்படுகிறது, ஆனால், அவர்களுக்கு கூடுதல் ஊட்டச்சத்துக்கள் தேவைப் படுகின்றன. எனவே, பழங்கள், காய்கறிகள், முழு தானியங்கள், கொழுப்பற்ற புரதங்கள், ஆரோக்கியமான கொழுப்புகள் உள்ளிட்ட பல்வேறு வைட்டமின்கள், தாதுக்களை வழங்கும் ஊட்டச்சத்து நிறைந்த உணவுகளை உட்கொள்வதில் 40 வயதுக்கு மேற்பட்ட பெண்கள் கவனம் செலுத்துவது முக்கியம். உடல் பருமன், நீரிழிவு, இதய நோய் போன்ற நாட்பட்ட நோய்களின் அபாயத்தை அதிகரிக்கும் பதப்படுத்தப்பட்ட, சர்க்கரை நிறைந்த உணவுகளை உட்கொள்வதை அவர்கள் குறைத்துக்கொள்ள வேண்டும்.
சில முக்கிய ஆரோக்கியக் குறிப்புகள்
உடற்பயிற்சி
40 வயதுக்கு மேற்பட்ட பெண்கள் ஆரோக்கியமாக முதுமையடைவதற்கு உடற்பயிற்சி முக்கிய தேவை. பெண்களுக்கு வயதாகும்போது தசை, எலும்பின் அடர்த்தி, இதய ஆரோக்கியம் ஆகியவற்றை பராமரிக்க வழக்கமான உடற்பயிற்சி அவசியம். பெண்கள் குறைந்தபட்சம் 30 நிமிடங்களாவது நடைபயிற்சி அல்லது சைக்கிள் ஓட்டுதல் போன்ற உடற்பயிற்சிகளை மேற்கொள்ள வேண்டும். தசை அடர்த்தி, எலும்பு அடர்த்தியை பராமரிக்க வலிமை உடற்பயிற்சி முக்கியமானது. மேலும் வயது தொடர்பான வீழ்ச்சிகளைத் தடுக்க உடல் செயல்பாடுகள் உதவுகின்றன.
தூக்கம்
ஆரோக்கியமான முதுமைக்கு போதுமான அளவு நிம்மதியான தூக்கம் மிகவும் முக்கியமானது. 40 வயதுக்கு மேற்பட்ட பெண்களுக்கு ஹார்மோன் மாற்றங்கள் காரணமாக தூக்கம் வருவது அல்லது தொடர்ச்சியாகத் தூங்குவது கடினமாக இருக்கலாம். வழக்கமான தூக்க அட்டவணையை பராமரித்தல், படுப்பதற்கு முன் ஸ்கிரீன் பார்க்காமல் தவிர்ப்பது, வசதியான தூக்க சூழலை உருவாக்குதல் போன்ற நல்ல தூக்க பழக்கவழக்கங்களை பயிற்சி செய்வது தூக்கத்தின் தரத்தை மேம்படுத்த உதவும். உடல், மன ஆரோக்கியத்தை பராமரிக்க போதுமான தூக்கம் அவசியம்.
மன அழுத்த மேலாண்மை
40 வயதுக்கு மேற்பட்ட பெண்களுக்கு ஆரோக்கியமாக முதுமையடைவதற்கு மன அழுத்த மேலாண்மை மற்றொரு முக்கிய தேவை. இதயநோய், நீரிழிவு, மனச்சோர்வு போன்ற நாட்பட்ட நோய்களின் அபாயம்மன அழுத்தம் அதிகரிக்கும். மேலும் ஒட்டுமொத்த மன ஆரோக்கியம், நல்வாழ்வையும் இது பாதிக்கலாம். 40 வயதுக்கு மேற்பட்ட பெண்கள் தியானம், யோகா, ஆழ்ந்த சுவாசப் பயிற்சிகள் போன்ற மன அழுத்த மேலாண்மை நுட்பங்களுக்கு முன்னுரிமை அளிக்க வேண்டும். இது மன இறுக்கத்தைத் தளர்த்தவும் மன அழுத்தத்தைக் குறைக்கவும் உதவும்.
சுகாதாரம்
ஆரோக்கியமாக முதுமையடைவதற்கு முன் தடுப்பு சுகாதாரம் மிக முக்கியமானது. வழக்கமான பரிசோதனைகள், ஸ்கிரீனிங் செய்துகொள்வதன் மூலம் உடல்நலப் பிரச்சினைகளை ஆரம்பத்திலேயே கண்டறிந்து சிகிச்சையளிக்க இது உதவும். மருத்துவரை வழக்கமாக சந்திப்பதற்கு திட்டமிட வேண்டும். மார்பகப் புற்றுநோய், கர்ப்பப்பை வாய்ப் புற்றுநோய் மற்றும் ஆஸ்டியோபோரோசிஸ் போன்ற பிரச்சினைகளைத்தவிர்க்க பரிந்துரைக்கப்பட்ட ஸ்கிரீனிங் வழிகாட்டுதல்களைப் பின்பற்ற வேண்டும். முன்தடுப்பு சுகாதாரம் பெண்கள் ஆரோக்கியமாக இருக்கவும், நாள்பட்ட நோய்களைத் தடுக்கவும்-நிர்வகிக்கவும் உதவும்.
சமூகத் தொடர்புகள்
கடைசியாக, 40 வயதைக் கடந்துவிட்டால் பெண்கள் ஆரோக்கியமாக முதுமையடை வதற்கு சமூக தொடர்புகள் முக்கியம். சமூகத்திலிருந்து விலகியிருப்பது தனிமையால் ஏற்படும் மனச்சோர்வு, பிற மனநலப் பிரச்னைகளுக்கான அபாயத்தை அதிகரிக்கும். நண்பர்கள், குடும்பத்தினருடன் நெருக்கமான சமூக தொடர்புகளை பெண்கள் பேண வேண்டும். சமூகம், சொந்தபந்தம் என்ற உணர்வை ஊக்குவிக்கும் நடவடிக்கைகளில் பங்கேற்பது இருத்தல் வேண்டும். முறையான ஊட்டச்சத்தை உட்கொள்ளுதல், வழக்கமான உடற்பயிற்சி, போதுமான தூக்கம், மன அழுத்தம் மேலாண்மை, முன்தடுப்புச் சுகாதாரம், சமூகத் தொடர்புகள் ஆகிய அனைத்தும் 40 வயதுக்கு மேற்பட்ட பெண்களுக்கான ஆரோக்கியமான வாழ்க்கை முறைக்குத் தேவையான முக்கிய அம்சங்கள். இந்த காரணிகளுக்கு முன்னுரிமை அளிப்பதன் மூலம், பெண்கள் ஆரோக்கியமாக முதுமையடைவதை மேம்படுத்தி உடல் ஆரோக்கியத்தையும் நல்வாழ்வையும் பராமரிக்கமுடியும். முதுமையை ஏற்றுக்கொண்டு மகிழ்வான நாட்களை எதிர்நோக்கிய வாழ்வும் அவசியம்.
– சங்கீதா
The post ஆனந்தமான முதுமையை வரவேற்போம்! appeared first on Dinakaran.