ஐதராபாத்: ‘புஷ்பா’ மற்றும் ‘புஷ்பா 2’ படத்தில் சுனில் மனைவியாக வில்லி வேடத்தில் நடித்திருந்தார் அனுசுயா பரத்வாஜ். தெலுங்கில் பல படங்களில் நடித்திருக்கும் இவர், தமிழில் சமுத்திரக்கனி நடித்த ‘விமானம்’ படத்தில் நடித்திருந்தார். இந்நிலையில் ஐதராபாத்தில் ஹோலி கொண்டாட்டத்தில் கலந்துகொள்ள இவர் ஒரு நிகழ்ச்சிக்கு சென்றிருந்தார். அங்கு மேடையில் ஏறி, ஜெயிலர் படத்தில் வரும் காவாலா பாடலுக்கு கவர்ச்சியாக ஆடை அணிந்து நடனம் ஆடினார். அப்போது இளம் ரசிகர்கள் பலரும் விசில் அடித்து ஆரவாரம் செய்து கொண்டிருந்தனர். அப்போது ரசிகர்கள் சிலர், ‘ஆன்ட்டி… ஆன்ட்டி…’ என அனுசுயாவை பார்த்து சத்தம் போட்டார்.
இதனால் கோபம் அடைந்த அனுசுயா, அங்கிருந்த மைக்கில், ‘‘நீங்கள் என்னைத் சீண்டினால், நான் என்ன செய்ய முடியும் என்பதை நான் உங்களுக்குக் காண்பிப்பேன். உங்களுக்கு தைரியம் இருந்தால், மேடைக்கு வாருங்கள்’’ என்றார். ஆன்ட்டி என அழைத்ததால் கோபம் அடைந்து அவர் இப்படி பேசியதால், நிகழ்ச்சியில் பரபரப்பு ஏற்பட்டது. அப்செட் அடைந்த அனுசுயா, சிறிது நேரம் நடனம் ஆடாமல் அமைதியாக நின்றிருந்தார். பிறகு நிகழ்ச்சி ஒருங்கிணைப்பாளர்கள் கேட்டதால், மீண்டும் நடனமாடிவிட்டு அங்கிருந்து புறப்பட்டு சென்றார். 39 வயதாகும் அனுசுயாவுக்கு திருமணமாகி 2 குழந்தைகள் உள்ளன.
