பெண்கள் பாதுகாப்பு விவகாரத்தில் பிரதமர் மோடி எதையும் செய்யவில்லை: காங்கிரஸ் தலைவர் கார்கே கடும் தாக்கு

புதுடெல்லி: பெண் பாதுகாப்பு விஷயத்தில் பிரதமர் மோடி எதையும் செய்யவில்லை என்று காங்கிரஸ் தலைவர் கார்கே தெரிவித்தார்.  இதுகுறித்து அவர் தனது எக்ஸ் பதிவில் கூறியிருப்பதாவது: நமது நாட்டில் பெண்களுக்கு எதிரான குற்றங்கள் ஒரு தீவிரமான பிரச்னை. இந்த குற்றங்களை தடுப்பது நாட்டிற்கு மிகப்பெரிய சவாலாகும். நாம் அனைவரும் ஒன்றிணைந்து சமூகத்தின் ஒவ்வொரு பிரிவினரையும் அழைத்துச் செல்வதன் மூலம் இதற்கு தீர்வு காண வேண்டும்.

எங்கள் பெண்களுக்கு இழைக்கப்படும் எந்த அநீதியும் சகிக்க முடியாதது, வேதனையானது, மிகவும் கண்டிக்கத்தக்கது. நாம் மகளுக்கு சம உரிமைகளை உறுதி செய்ய வேண்டும். பெண்குழந்தை காப்போம் என்ற வெறும் பேச்சு மட்டும் போதாது. நாட்டில் பெண்களுக்கு எதிரான குற்றங்கள் ஒவ்வொரு மணி நேரமும் 43 பதிவு செய்யப்படுகின்றன. நம் நாட்டில் மிகவும் பாதிக்கப்படக்கூடிய தலித்-பழங்குடி வகுப்பைச் சேர்ந்த பெண்கள் மற்றும் குழந்தைகளுக்கு எதிராக தினமும் 22 குற்றங்கள் பதிவு செய்யப்படுகின்றன. பயம், மிரட்டல், சமூக காரணங்களால் எண்ணற்ற குற்றங்கள் பதிவு செய்யப்படவில்லை.

பிரதமர் மோடி செங்கோட்டையில் தனது உரையில் பெண்கள் பாதுகாப்பு குறித்து பலமுறை பேசியும், பெண்களுக்கு எதிரான குற்றங்களை தடுக்க கடந்த 10 ஆண்டுகளாக அவரது அரசு உறுதியான எதையும் செய்யவில்லை. ஒவ்வொரு சுவரிலும் பெண் குழந்தைகளை பாதுகாப்போம் என்ற ஓவியம் வரைவது சமூக மாற்றத்தை ஏற்படுத்துமா அல்லது அரசு எடுக்கும் நடவடிக்கை மூலம் சட்டம், ஒழுங்கு அதை திறமையாக மாற்றுமா. அதற்கு வசதியாக நாம் தடுப்பு நடவடிக்கைகளை எடுக்க முடியுமா? 2012ம் ஆண்டு டெல்லியில் நிர்பயா சம்பவம் நடந்தபோது, ​​நீதிபதி வர்மா கமிட்டி அமைக்கப்பட்டது.

அந்த பரிந்துரைகளை இன்று முழுமையாக அமல்படுத்த முடியுமா? 2013ல் இயற்றப்பட்ட பணியிடத்தில் பெண்களுக்கு ஏற்படும் பாலியல் துன்புறுத்தல் சட்டத்தின் விதிகள் முறையாகப் பின்பற்றப்பட்டால்தான், பணியிடத்தில் நமது பெண்களுக்கு அச்சமில்லாத சூழலை உருவாக்க முடியும். அரசியலமைப்புச் சட்டம் பெண்களுக்கு சம அந்தஸ்தை வழங்கியுள்ளது.

பாலின உணர்வூட்டும் பாடத்திட்டம், பாலின பட்ஜெட், பெண்களுக்கான கால் சென்டர்கள், தெரு விளக்குகள், பெண்கள் கழிப்பறைகள் போன்ற அடிப்படை வசதிகள், காவல்துறை சீர்திருத்தங்கள், நீதித்துறை சீர்திருத்தங்கள் ஆகியவற்றை மேற்கொண்டு நமது பெண்களுக்கான சுதந்திரமான சூழலை உருவாக்கி, அச்சத்தை அகற்றுவதை உறுதிப்படுத்தக்கூடிய ஒவ்வொரு நடவடிக்கையையும் எடுக்க வேண்டிய நேரம் வந்துவிட்டது என்றார்.

The post பெண்கள் பாதுகாப்பு விவகாரத்தில் பிரதமர் மோடி எதையும் செய்யவில்லை: காங்கிரஸ் தலைவர் கார்கே கடும் தாக்கு appeared first on Dinakaran.