மும்பை: வங்கிகள் கடன் வசூல் செய்யும் போது அத்துமீறுவதை தடுக்க போன் அழைப்புகளை பதிவு செய்ய ரிசர்வ் வங்கி உத்தரவிட்டுள்ளது. வங்கிகள் கடன் வசூல் செய்யும் போது அத்துமீறுவதாகவும், அநாகரிகமாக நடந்து கொள்வதாகவும் புகார் எழுந்தது. இதை தடுக்க அனைத்து வங்கிகளுக்கும் ரிசர்வ் வங்கி புதிய வழிகாட்டுதல் நெறிமுறைகளை வெளியிட்டுள்ளது. அதில் கூறியிருப்பதாவது:
* வங்கி கடன் வசூலில் ஈடுபடும் முகவர்களுக்கு பயிற்சியை கட்டாயமாக்க வேண்டும்.
* ஒரு முகவரால் கடன் வாங்குபவருக்கு செய்யப்படும் அனைத்து தொலைபேசி அழைப்புகளும் பதிவு செய்யப்படுவதை ஒரு வங்கி உறுதி செய்ய வேண்டும்
* ஒரு முகவர் கடன் வாங்குபவருடன் நாகரீகமான முறையில் தொடர்பு கொள்கிறார் என்பதை உறுதி செய்ய வேண்டும்.
* கடன் நிலுவைத் தொகையை வசூலிக்க கடன் வாங்குபவரின் இடத்திற்குச் செல்லும்போது கண்ணியத்தையும் ஒழுக்கத்தையும் பராமரிக்க வேண்டும்.
* கடன் மீட்பு முயற்சிகள் தவறான வார்த்தைகளைப் பயன்படுத்துவதையும், பொருத்தமற்ற செய்திகளை அனுப்புவதையும் தவிர்க்க வேண்டும்.
* குடும்பத்தில் துக்கம் அல்லது பிற பேரிடர் நிகழ்வுகள், திருமண விழாக்கள் உள்ளிட்ட பொருத்தமற்ற சந்தர்ப்பங்களில் கடன் மீட்பு முயற்சிகள் மேற்கொள்ளப்படக்கூடாது. இவ்வாறு குறிப்பிடப்பட்டுள்ளது.
