களக்காடு, மார்ச் 10: களக்காட்டில் பீடிக்கடையை மாற்ற எதிர்ப்பு தெரிவித்து, பெண் பீடி தொழிலாளர்கள் திடீர் ஸ்டிரைக்கில் ஈடுபட்டதால் பரபரப்பு ஏற்பட்டது.
களக்காடு போலீஸ் நிலையம் அருகே வரதராஜபெருமாள் கோயில் வடக்கு ரதவீதியில் தனியார் பீடிக்கடை செயல்பட்டு வருகிறது. இந்த கடையில் களக்காடு, காடுவெட்டி, எஸ்.என்.பள்ளிவாசல், தோப்பூர், சிதம்பரபுரம் மற்றும் சுற்றுவட்டார கிராமங்களை சேர்ந்த 250க்கும் மேற்பட்ட பெண்கள் பீடி சுற்றி வருகின்றனர். இந்த கடையை களக்காட்டில் இருந்து 3 கிமீ தொலைவில் உள்ள சிதம்பராபுரத்திற்கு இடமாற்றம் செய்ய நிர்வாகத்தினர் நடவடிக்கைகள் மேற்கொண்டு வருவதாக கூறப்படுகிறது. களக்காட்டில் இருந்து சிதம்பரபுரத்திற்கு போதிய பஸ் வசதி கிடையாது. எனவே பெண்கள் நடந்து மட்டுமே செல்ல முடியும், பீடி சுற்றும் பெண்கள் 3 கிமீ தூரம் நடந்து செல்வது சிரமம் என்பதால் பலர் பீடி சுற்றும் தொழிலை கைவிட வேண்யது வரும் என்றும், அதனால் தங்களது வாழ்வாதாரம் பாதிக்கப்படும் எனவும் பீடி தொழிலாளர்கள் புகார் தெரிவித்து வருகின்றனர்.