தா.பேட்டை, பிப் .7: தா.பேட்டை தெருக்களில் அதிகளவு நாய்கள் சுற்றித் திரிவதால் பொதுமக்கள், குழந்தைகள் வெளியில் நடமாட அச்சம் அடைவதோடு வாகனங்களின் குறுக்கே வருவதால் விபத்துகள் நேரிடுகிறது. எனவே நாய்களை பிடிக்க வேண்டும் என பொதுமக்கள் கோரிக்கை
விடுத்துள்ளனர். தா.பேட்டை பேரூராட்சியில் 15 வார்டுகள் உள்ளது. இங்கு தெருக்களில் அதிகளவு நாய்கள் சுற்றித் திரிவதால் பொதுமக்களுக்கு மிகுந்த இடையூறாக உள்ளது என தெரிவிக்கின்றனர். இதுகுறித்து தா.பேட்டையை சேர்ந்த கந்தசுப்பிரமணியன் என்பவர் கூறும்போது, தா.பேட்டை பேரூராட்சிக்குட்பட்ட தெருக்களில் அதிகளவு தெருநாய்கள் சுற்றி திரிகிறது. இதனால் முதியோர்கள், குழந்தைகள், சிறுவர்கள் வெளியே நடமாடுவதற்கு அச்சம் அடைகின்றனர். பள்ளி செல்லும் மாணவ, மாணவிகளை தெருநாய்கள் துரத்துகிறது. நாய்கள் ஒன்றுக்கொன்று அடித்துக் கொண்டு சாலையில் வரும் இருசக்கர வாகனங்களில் வந்து விழுவதால் விபத்துகள் ஏற்படுகிறது.