பெங்களூரு: மங்களூரு மாநகரில் நடைபெற்ற ஆட்டோ குண்டு வெடிப்பு சம்பவத்தில் முக்கிய குற்றவாளியாக கைது செய்யப்பட்டுள்ள முகமது ஷாரிக், ஏ.கே47 துப்பாக்கி தயாரிக்கும் முயற்சியில் ஈடுபட்டுள்ளது விசாரணையில் தெரியவந்துள்ளது. கர்நாடக மாநிலத்தில் கடந்த 19ம் தேதி மாலை ஆட்டோவில் குண்டு வெடிப்பு சம்பவம் தொடர்பாக நடந்து வரும் விசாரணையில் நாளுக்கு நாள் புது வடிவம் பெற்று வருகிறது. இந்த சம்பவத்தில் முக்கிய குற்றவாளியாக இருக்கும் முகமது ஷாரிக்கின் செல்போன் மாநில போலீசாரின் கையில் கிடைத்தது. அதில் ஹிஜாப் பிரச்னைக்கு பின், மங்களூருவை இலக்காக வைத்து ஷாரிக் செயல்பட்டு இருப்பது தெரியவந்துள்ளது. கடந்த 8 மாதங்களில் சர்வதேச அளவில் இயங்கி வரும் லஷ்கர்-இ-தொய்பா உள்பட பல தீவிரவாத அமைப்புகளுடன் 189 முறை தொடர்பு கொண்டு இருந்தது தெரியவந்துள்ளது. மேலும் தீவிரவாதிகள் அதிகமாக பயன்படுத்தி வரும் ஏ.கே-47 ரக துப்பாக்கியை இணையதள வசதியுடன் தயாரிக்க முயற்சி மேற்கொண்டதுடன், அதற்கு தேவையான பொருட்களை ஆன்லைன் மூலம் ஆர்டர் செய்து வரவழைத்து இருப்பதும் தெரியவந்துள்ளது.