சென்னை: ஒன்றிய அரசின் பணியாளர் தேர்வாணையத்தின் போட்டித்தேர்வுக்கு, தமிழக இளைஞர்கள் தயாராகும் வகையில் பாடக்குறிப்புகள் இணையத்தில் பதிவேற்றம் செய்யப்பட்டுள்ளதாக வேலைவாய்ப்பு மற்றும் பயிற்சித் துறை தெரிவித்துள்ளது. இதுகுறித்து, வேலைவாய்ப்பு மற்றும் பயிற்சித் துறையின் இயக்குநர் கொ.வீரராகவ ராவ் வெளியிட்ட அறிக்கை: ஒன்றிய அரசின் பணியாளர் தேர்வாணையத்தால் பல்வேறு துறைகளில், பல்நோக்கு பணியாளர், பெண்கள் படைப்பயிற்றுநர், மருத்துவ உதவியாளர், பொறுப்பாளர் போன்ற 3,261 பணிக்காலியிடங்கள் அறிவிக்கப்பட்டுள்ளன. இப்பணிக்காலியிடங்களுக்கு www.ssc.nic.in என்ற தேர்வாணையத்தின் இணையதளம் வாயிலாக விண்ணப்பிக்க வேண்டும். இத்தேர்வுகளுக்கு உரிய கட்டணத்துடன் இணைய வழியாக விண்ணப்பிக்க கடைசி நாள் 25.10.2021 ஆகும்.