சென்னை: சட்டப்பேரவையில் சிறைகள் மற்றும் சீர்திருத்தப்பணிகள் மானியக்கோரிக்கையின் போது சட்டத்துறை அமைச்சர் எஸ்.ரகுபதி வெளியிட்ட அறிவிப்பு:

* காஞ்சிபுரத்தில் தற்போது இயங்கி வரும் மாவட்ட நீதிமன்றம் எண்2ஐ முதன்மை மாவட்ட மற்றும் அமர்வு நீதிமன்றமாக மாற்றி அமைக்கப்படும்.

* காஞ்சிபுரத்தில், ஒரு முதன்மை குற்றவியல் நடுவர் நீதிமன்றம் அனைத்து உட்கட்டமைப்பு வசதிகளுடன் அமைக்கப்படும்.

* சென்னை உயர் நீதிமன்றத்தின் மதுரை கிளையில் வழக்குறைஞர்களுக்கான கூடுதல் வளாக கட்டிடம் அனைத்து உட்கட்டமைப்பு வசதிகளுடன் ரூ.4.28 கோடி செலவில் கட்டப்படும்.

* சென்னையில் உள்ள சிறைகள் மற்றும் சீர்திருத்தப்பணிகள் துறை தலைமை அலுவலகத்துக்கு, 40 கணினிகள் மற்றும் 10 நகலெடுக்கும் இயந்திரங்கள் ரூ.44 லட்சத்தில் கொள்முதல் செய்யப்படும்.

* அனைத்து மத்திய சிறைகள், பெண்கள் தனிச்சிறைகள்(புழல், வேலூர், திருச்சி, கோவை, மதுரை) மற்றும் மாவட்ட சிறை(ம) இளம் குற்றவாளிகள் சீர்திருத்தப்பள்ளி, புதுக்கோட்டை ஆகியவற்றிற்கு 15 கனரக சலவை இயந்திரங்கள்  ரூ.60 லட்சத்தில் கொள்முதல் செய்யப்படும்.

* அனைத்து மத்திய சிறைகளுக்கும் 9 ஊடுகதிர் அலகிடல் கருவிகள், பழைய இயந்திரங்களுக்கு மாற்றீடாக ரூ.180 லட்சம் செலவில் கொள்முதல் செய்யப்படும்.

* சிறை பணியாளர் குடியிருப்புகளில் 500 லிட்டர் கொள்ளவு  கொண்ட குடிநீர் சுத்திகரிப்பு சாதனம் ரூ.18.90 செலவில் நிறுவப்படும். சிறைகளை சீர்திருத்த மையங்களாக மாற்றுவதற்கான நடவடிக்கைகள் மேற்கொள்ளப்பட்டு, சிறைவாசிகளின் சிறை தண்டனை முடிந்ததும், அவர்கள் இயல்பான வாழ்க்கைக்கு திரும்புவதற்கான விரிவான நடவடிக்கை மேற்கொள்ளப்படும்.