நாய்பிடாவ்: மியான்மரின் ஆயுதப்படை தினமான நேற்று ஒரே நாளில் போராட்டக்காரர்கள், சிறுவர்கள், பச்சிளம் குழந்தைகள் உள்பட 114 பேரை சுட்டுக் கொன்று ராணுவம் கொலைவெறி தாண்டவம் ஆடியுள்ளது. ராணுவம் மக்களை பாதுகாக்கும் என்றும் ஜனநாயகத்துக்கு பாடுபடும் என்றும் ஜெனரல் மின் ஆங் காலிங் கூறிய மறுநாளே அவரின் கூற்றுக்கு முரண்பாடாக இந்த மிருகத்தனமான தாக்குதல் நடைபெற்றுள்ளது. மியான்மரின் ஆயுதப்படை தினத்தை கொண்டாட இருப்பதால் அதற்கு இடையூறு செய்யும் விதமாக போராட்டத்தில் ஈடுபடுபவர்கள் யாராக இருந்தாலும் அவர்களது தலையில் அல்லது பின் பகுதியில் துப்பாக்கிச்சூடு நடத்தப்படும் என நேற்று ராணுவம் எச்சரிக்கை விடுத்திருந்தது. அதன்படி போராட்டக்காரர்களை வேட்டையாடிய ராணுவம் 13 வயதுடைய 2 சிறார் மற்றும் பச்சிளம் குழந்தையை கொன்றிருப்பதாக வெளியான செய்தி உலக நாடுகளை அச்சத்தில் ஆழ்த்தியுள்ளது.