சுரண்டை: தென்காசி மாவட்டம் சுரண்டை அருகே உள்ள குலையனேரி ஊராட்சிக்குட்பட்ட பகுதியில் இரட்டைகுளம் உள்ளது. இந்த குளத்திற்கு அடவிநயினார் அணையில் இருந்து அனுமன்நதி வழியாக தண்ணீர் வருகிறது. இதன் மூலம் சுரண்டை, சிவகுருநாதபுரம், இரட்டைகுளம், குலையநேரி ஆகிய கிராமங்களைச் சேர்ந்த சுமார் 10 ஏக்கர் விவசாய நிலங்கள் பாசன வசதி பெறுகின்றன. கடந்த சில நாட்களாக சுரண்டை மற்றும் அதன் சுற்றுவட்டார பகுதிகளில் இரவு நேரங்களில் நல்ல மழை பெய்கிறது. நேற்றிரவும் மழை பெய்தது. இந்நிலையில் இரட்டைகுளத்தில் உபரிநீர் வெளியேறும் மதகு அருகில் திடீரென்று குளத்து கரை உடைந்து அதிலிருந்து மள,மளவென்று தண்ணீர் வெளியறி அருகில் உள்ள வயல்களுக்குள் புகுந்தது. இதனால் வயல்களில் பயிரிடப்பட்டிருந்த நெற்பயிர்கள் நீரில் மூழ்கி சேதமடைந்தன.