ஈரோடு: நீர்மின் அணைகள், பவானிசாகர் அணை தூர்வாரப்படாததால் 16 டிஎம்சி தண்ணீர் வீணாக கடலில் கலந்துள்ளதாக விவசாயிகள் குற்றம்சாட்டி உள்ளனர்.இது குறித்து கீழ்பவானி விவசாயிகள் நலச்சங்க செயலாளர் நல்லசாமி கூறியிருப்பதாவது: பவானிசாகர் அணை கடந்த 1955ல் கட்டப்பட்டது. இதன் கொள்ளளவு 32.8 டிஎம்சி. நீலகிரி மாவட்டத்தில் கட்டப்பட்டுள்ள மொத்த நீர் மின் அணைகளின் கொள்ளளவு 18.3 டிஎம்சி. நீர்மின் அணைகள் கட்டப்பட்ட நாளில் இருந்து இதுவரை தூர்வாரப்படவில்லை. நீர்மின் அணைகளில் பாதி அளவு சேறும், சகதியும் உள்ளது. இந்நிலையில், கடந்தாண்டு நீலகிரி மாவட்டத்தில் பெய்த பருவமழையால் நீர்மின் அணைகள் மற்றும் பவானிசாகர் அணை ஆகியவை நிரம்பி உபரி நீர் கடலுக்கு திறந்துவிடப்பட்டது. மொத்தம் 16 டிஎம்சி தண்ணீர் வீணாக கடலுக்கு திறந்துவிடப்பட்டுள்ளது. இதற்கு முக்கிய காரணம், அணைகள் தூர்வாரப்படாததே.