கிராமி விருது: லேடி காகா அசத்தல்

லாஸ்ஏஞ்சல்ஸ்: லாஸ் ஏஞ்சல்ஸின் கிரைப்டோ அரீனாவில் 68வது கிராமி விருதுகள் விழா நேற்று நடைபெற்றது. டிரெவர் நோவா ஆறாவது, கடைசி முறையாக இதைத் தொகுத்து வழங்கினார். கென்ட்ரிக் லாமர் ஒன்பது, லேடி காகா ஏழு பரிந்துரைகளைப் பெற்ற நிலையில், பேட் பன்னி ‘ஆண்டின் சிறந்த ஆல்பம்’ வென்றதும், முதல் கே-பாப் கிராமி விருதை ‘கோல்டன்’ பாடல் பெற்றதும் நிகழ்ச்சியின் சிறப்பம்சங்களாகும். பொதுப் பிரிவின் முக்கிய விருதுகளில், ‘Debi Tirar Mas Fotos’ ஆல்பத்திற்காக பேட் பன்னி ‘ஆண்டின் சிறந்த ஆல்பம்’ விருதை வென்றார். இது முதல் முழு ஸ்பானிஷ் மொழி ஆல்பத்தின் வெற்றியாகும். கென்ட்ரிக் லாமரின் ‘லூதர்’ ‘ஆண்டின் சிறந்த பதிவு’ ஆனது. ‘ஆண்டின் சிறந்த பாடல்’ லேடி காகாவின் ‘அப்ரகடப்ரா’, ‘சிறந்த புதிய கலைஞர்’ ஒலிவியா டீன்.

பாப் பிரிவில் லேடி காகாவின் ‘மேஹம்’ (சிறந்த பாப் வோக்கல் ஆல்பம்), சப்ரினா கார்பென்டரின் ‘மேன்சைல்ட்’ (சிறந்த பாப் தனிநபர் நிகழ்ச்சி), சிந்தியா எரிவோ & அரியானா கிராண்டின் ‘டிஃபையிங் கிராவிட்டி’ (சிறந்த பாப் டூயோ/குரூப் பெர்ஃபார்மன்ஸ்) ஆகியன விருதுகளைப் பெற்றன. டான்ஸ் பிரிவில் FKA twigs-இன் ‘எவ்செக்ஸுவா’ சிறந்த டான்ஸ்/மின்னணு ஆல்பமாகவும், லேடி காகாவின் ‘அப்ரகடப்ரா’ சிறந்த டான்ஸ் பாப் பதிவாகவும் தேர்ந்தெடுக்கப்பட்டன. ஸ்டீவன் ஸ்பீல்பெர்க்கின் ‘மியூசிக் பை ஜான் வில்லியம்ஸ்’ சிறந்த இசைத் திரைப்படமாக அங்கீகரிக்கப்பட்டு EGOT அந்தஸ்தை நிறைவு செய்தது.

* தலாய் லாமாவுக்கு விருது
சிறந்த ஆடியோ புத்தகம் பிரிவில் திபெத்திய ஆன்மிக தலைவர் தலாய் லாமாவின் மெடிடேஷன்ஸ் ஆல்பத்திற்கு விருது கிடைத்திருக்கிறது. இதன் மூலம் 90வது வயதில் கிராமி விருது பெறும் ஆன்மிக தலைவர் என்ற சிறப்பை அவர் பெற்றுள்ளார்.