மும்பை: பாலியல் பலாத்கார வழக்கில் சிக்கி சிறை சென்ற ஜானி மாஸ்டரின் பெயரை தனது வீடியோவில் நீக்கினார் கியரா அத்வானி. பாலிவுட் நடிகை கியரா அத்வானி, தெலுங்கில் ராம் சரண் ஜோடியாக ‘கேம் சேஞ்சர்’ படத்தில் நடித்துள்ளார். இப்படத்தை ஷங்கர் இயக்கியுள்ளார். இப்படத்தின் பாடல்களுக்கு ஜானி மாஸ்டர்தான் நடனம் அமைத்தார்.
இந்நிலையில் ஜானியின் நடன குழுவில் இருந்த இளம்பெண், அவர் மீது பாலியல் புகார் கூறினார். இதையடுத்து போலீசார் வழக்கு பதிவு செய்து ஜானி மாஸ்டரை கைது செய்தனர். தற்போது அவர் ஜாமீனில் வந்துள்ளார். 2 தினங்களுக்கு முன் கியரா அத்வானி, தனது இன்ஸ்டாகிராம் பக்கத்தில் வீடியோ ஒன்றை வெளியிட்டார். அதில் அவர் கேம் சேஞ்சர் படத்துக்காக நடன பயிற்சி எடுக்கும் வீடியோவை வெளியிட்டிருந்தார். அதன் பிறகு கியரா இந்த பாடல் மற்றும் நடனம் குறித்து பேசுகிறார். அதில் அவர் ஜானி மாஸ்டரை புகழ்ந்திருப்பார். இந்த வீடியோ வைரலான நிலையில், ரசிகர்கள் பலர், பாலியல் வழக்கில் சிக்கிய ஜானி மாஸ்டரை பற்றி நீங்கள் பேசலாம்? பெண்ணாக இருந்துகொண்டு இன்னொரு பெண்ணின் வலி உங்களுக்கு புரியவில்லையா என்றெல்லாம் கருத்துகளை பதிவிட ஆரம்பித்தனர்.
இந்த விவகாரம் அடுத்த மாதம் திரைக்கு வரும் படத்தின் வசூலில் பாதிப்பை ஏற்படுத்தலாம் என இயக்குனர் ஷங்கர் தரப்பில் கூறப்பட்டதாக சொல்லப்படுகிறது. இதையடுத்து உடனடியாக அந்த வீடியோவில் ஜானி மாஸ்டரை பற்றி தான் பேசும் வார்த்தைகளை நீக்கியுள்ளார் கியரா. அத்துடன் அந்த பதிவில் ஜானியை ‘கோட்’ செய்திருந்ததையும் நீக்கியுள்ளார்.
