இதையடுத்து, 1991ல் அறிமுகம் செய்யப்பட்ட வழிபாட்டு தலங்கள் சட்டத்தின் சில பிரிவுகளுக்கு எதிர்ப்பு தெரிவித்தும், அந்த சட்டம் செல்லாது என்று அறிவிக்கக் கோரியும் அஸ்வினி குமார் உட்பட ஆறு பேர் தொடர்ந்த வழக்குகளை விசாரித்த உச்ச நீதிமன்றம், இதுகுறித்த நிலைப்பாட்டை ஒன்றிய அரசு தெரிவிக்க வேண்டும் என்று கடந்த டிசம்பர் மாதம் நோட்டீஸ் பிறப்பித்து உத்தரவிட்டிருந்தது.
மேலும் வழிபாட்டுத் தலங்கள் (சிறப்பு விதிகள்) சட்டம், 1991ன் அரசியலமைப்புச் சட்டத்தின் செல்லுபடியை கேள்விக்குட்படுத்தும் வழக்குகள் அனைத்தையும் உச்ச நீதிமன்றத்தின் மூன்று நீதிபதிகள் கொண்ட அமர்வு விசாரணை நடத்தும் எனவும், அதே போன்று இந்த விவகாரத்தில் மேற்கொண்டு புதிய மனுக்களை தாக்கல் செய்யக் கூடாது என்றும் தெரிவித்திருந்தது.
இந்த நிலையில் வழிபாட்டு தலங்கள் (சிறப்பு விதிகள்) சட்டம் தொடர்பாக தாக்கல் செய்யப்பட்ட புதிய மனுவானது உச்ச நீதிமன்றத்தில் தலைமை நீதிபதி சஞ்சீவ் கண்ணா, நீதிபதி சஞ்சய் குமார் ஆகியோர் அமர்வில் விசாரணைக்கு வந்தபோது நீதிபதி எழுப்பிய கேள்வியில், ‘‘இதே கோரிக்கைகள் கொண்ட வழக்குகள் மூன்று நீதிபதிகள் கொண்ட அமர்வு விசாரிப்பதற்காக ஒத்திவைக்கப்பட்டுள்ளது. அப்படி இருக்கும் நிலையில் இந்த புதிய மனுவை ஏற்க முடியாது என்பது மட்டுமில்லாமல், நாங்கள் இதனை விசாரிக்கவும் விரும்பவில்லை என்று தெரிவித்து புதிய மனுவை தள்ளுபடி செய்து உத்தரவிட்டனர்.
The post வழிபாட்டு தலங்கள் சட்டம் தொடர்பான புதிய மனு உச்ச நீதிமன்றம் விசாரிக்க மறுப்பு appeared first on Dinakaran.
