சென்னை: துபாயில் நேற்று நடந்த 24ஹெச் கார் ரேஸ் 991 பிரிவில், அஜித் குமாரின் ரேஸிங் அணி 3வது இடத்தை பிடித்துள்ளது. இதையடுத்து திரையுலகினரும், அரசியல் பிரமுகர்களும், ரசிகர்களும் அஜித் குமாருக்கு சமூக வலைத்தளங்களின் மூலம் வாழ்த்து தெரிவித்து வருகின்றனர். இந்நிலையில், தமிழக துணை முதல்வர் உதயநிதி ஸ்டாலின் நேற்று மாலை தனது எக்ஸ் தளத்தில் வெளியிட்டுள்ள பதிவில், அஜித்குமார் மற்றும் அவரது அணிக்கு வாழ்த்து தெரிவித்துள்ளார். அவர் கூறியதாவது: 2025 துபாயில் நடந்த 24எச் கார் ரேஸ் 991 பிரிவில் அஜித் குமார் மற்றும் அவரது குழுவினர் 3வது இடத்தை பிடித்துள்ளதை அறிந்து மகிழ்ச்சி அடைகிறேன்.

இந்த குறிப்பிடத்தக்க சாதனைக்காக அஜித் குமார் மற்றும் அவரது குழுவினருக்கு மனமார்ந்த வாழ்த்துகளை தெரிவித்துக்கொள்கிறேன். அதுமட்டுமின்றி, அஜித் குமார் ரேஸிங் அணி திராவிட மாடல் அரசை காட்சிப்படுத்தும் விதமாக, தமிழ்நாடு ஸ்போர்ட்ஸ் லோகோவை கார் ரேஸின்போது பயன்படுத்தியதற்கு நன்றி தெரிவித்துக்கொள்கிறேன். தொடர்ந்து பல வெற்றிகளை பெற்று நமது தேசத்திற்கும், தமிழ்நாட்டிற்கும் மேன்மேலும் பெருமை சேர்க்க வேண்டும் என்று அஜித் குமார் மற்றும் அவரது குழுவினரை வாழ்த்துகிறேன். இவ்வாறு உதயநிதி ஸ்டாலின் தெரிவித்துள்ளார்.

 

The post துபாய் கார் ரேஸில் 3வது இடம் துணை முதல்வர் உதயநிதி அஜித்குமாருக்கு வாழ்த்து appeared first on Dinakaran.