நியுயார்க்: உலக பிளிட்ஸ் செஸ் சாம்பியன்ஷிப் போட்டியின் மகளிர் பிரிவில் தமிழ்நாட்டை சேர்ந்த வைஷாலி அற்புதமாக விளையாடி காலிறுதிக்கு தகுதி பெற்றார். அமெரிக்காவின் நியுயார்க் நகரில், உலக பிளிட்ஸ் சாம்பியன்ஷிப் போட்டிகள் நடந்து வருகின்றன. அதிவிரைவாக காய்களை நகர்த்த வேண்டிய இந்த போட்டிகளில் இந்திய கிராண்ட் மாஸ்டரும் தமிழ்நாட்டை சேர்ந்தவருமான வைஷாலி நேற்று நடந்த போட்டிகளில் ஜார்ஜியாவின் நானா ட்ஸாக்னிட்ஸே, ரஷ்யாவின் வாலன்டினா கினினா ஆகியோரை வென்றார். இதையடுத்து 11 சுற்றுகள் முடிவில் 8 வெற்றிகள், 3 டிராக்களுடன் 9.5 புள்ளிகள் பெற்று புள்ளிப் பட்டியலில் முதலிடம் பெற்றார்.

அவருக்கு அடுத்த இடத்தை ரஷ்ய வீராங்கனை கடேரினா லேக்னோ 8.5 புள்ளிகளுடன் பிடித்தார். முதல் 8 இடங்களுக்குள் இடம் பிடித்த மற்ற 6 வீராங்கனைகள் தலா 8 புள்ளிகள் பெற்றிருந்தனர். புள்ளிப் பட்டியலில் முதலிடம் பிடித்ததை அடுத்து வைஷாலி நாக்அவுட் போட்டியாக காலிறுதிப் போட்டிக்கு தகுதி பெற்றார். காலிறுதியில் சீன வீராங்கனை ஸு ஜீனேருடன் வைஷாலி மோதவுள்ளார்.

ஓபன் பிரிவில் உலக நம்பர் 1 வீரர் மேக்னஸ் கார்ல்சன் உட்பட 10 வீரர்கள் மோதினர். 11 சுற்றுகள் முடிவில் ரஷ்ய வீரர் இயான் நெபோம்னியாச்சி 9.5 புள்ளிகளுடன் முதலிடம் பிடித்தார். கார்ல்சனுக்கு 3வது இடமே கிடைத்தது. இந்த போட்டியில் இந்தியாவுக்கு பின்னடைவாக, முதல் 8 இடங்களில் ஒரு இந்தியர் கூட இடம்பெற முடியவில்லை.

The post உலக பிளிட்ஸ் செஸ் சாம்பியன்ஷிப் தமிழகத்தின் வைஷாலி காலிறுதிக்கு தகுதி: புள்ளிப் பட்டியலில் முதலிடம் appeared first on Dinakaran.